Centos de pessoas saírom o passado sábado às ruas da Crunha para manifestar o seu respaldo à vizinha Pepita Seoane que está chamada a declarar o vindeiro 12 de Junho nos Julgados da cidade por um suposto delito de “enaltecimento do terrorismo”. A citaçom parte da Audiência Nacional e deve-se a umhas declaraçons feitas por Pepita ao diário “El Mundo” publicadas em Julho de 2013. A petiçom fiscal para a mulher de 75 anos é de dous anos de prisom.
A mobilizaçom baixo a legenda “Todas/os con Pepita, contra a represión” partiu às oito da tarde do Obelisco. Diversos coletivos sociais, políticos e culturais respaldárom a marcha que foi encabeçada pola própria Pepita Seoane que portava duas flores nas maos, umha branca e outra vermelha.
À chegada à Praça de Maria Pita umha porta-voz da Plataforma “Pola absolución de Pepita e contra a represión” leu um comunicado no que explicou o contexto repressivo no que estamos imersas, “atopamo-nos num momento no que qualquera tipo de protesto ou mobilizaçom popular está sendo duramente castigado polo aparato repressivo do Estado”, apontou.
Do mesmo jeito detalhou-se a situaçom de Pepita Seoane a quem qualificárom como infatigável solidária com todas as pessoas retaliadas polo sistema capitalista e que por este motivo “estamos ante um intento de reprimir nom só a Pepita se nom ao conjunto de solidárias com as pessoas presas e a todas as que enfrentam ao Estado”, dixo a porta-voz.
O vindeiro 12 de Junho haverá outra manifestaçom que sairá às 09:30 da Praça de Monforte e que acompanhará a Pepita Seoane até as portas do Julgado.
Desde o Organismo Popular Anti-repressivo CEIVAR e como parte ativa da plataforma em prol da absoluçom de Pepita, fazemos um chamamento a secundar a manifestaçom e emitimos todo o nosso apoio com a galega retaliada.