Desde a passada terça feira partidários da monarquia espanhola convocárom mediante as redes sociais concentraçons em defesa “da Constituçom e da monarquia parlamentária” em vários pontos do Estado. A mobilizaçom era para o dia de hoje a partir das 20h e umha das ubicaçons sinaladas era a Praça do Toral em Compostela.
Média hora antes da cita marcada para os monárquicos umhas cincuenta independentistas e activistas de coletivos sociais e políticos chantárom-se na praça. O objetivo era rechaçar a mobilizaçom monárquica mas o rechaço tam siquer se puido produzir já que só se apresentárom ums cinco monárquicos.
Os monárquicos após levar um quarto de hora aguardando a que chegara mais gente confirmárom o absoluto fracasso da sua convocatória. No outro lado da praça continuavam as independentistas concentradas silenciosamente e sem portar nengumha simbologia. A sua mera presença serviu para dissuadir qualquer intento de exibir faixas ou bandeiras espanholas se esta houvera sido a intençom dos monárquicos.
Como vém sendo habitual na escalada de repressom que estamos a viver na Galiza, a Polícia Nacional presentou-se para tentar intimidar às independentistas. Dumha rua da zona velha aparecérom vinte agentes caminhando a passo apurado em formaçom, rodéarom a Praça do Toral e incluso chegárom a perseguir às independentistas que nesse intre davam por rematada a concentraçom. Finalmente nom se produzirom identificaçons.