No dia de ontem realizarom-se assembleias informativas em Ferrol, Lugo, Ourense, Vigo e Compostela. Para esta quarta-feira, 31 de outubro, estam convocadas concentraçons em solidariedade com Sílvia e Julio em Vigo às 20h diante do MARCO e em Compostela às 20:30h na praça do Pam.
Passamos a relatar o sucedido nos atos de ontem.
FERROL:
Desde primeira hora da manhá dúzias de pessoas concentravam-se diante da esquadra da policia nacional de Ferrol, sita na Avenida de Vigo, para interessar-se polo estado e situaçom dos dous vizinhos da comarca que na noite anterior foram detidos na sua casa no bairro de Santa Icia. As horas transcorriam e o número de gente que por ali passava era maior, mais os intentos por parte de familiares, advogados e companheiras de conseguir informaçom eram nulos pola aplicaçom da lei antiterrorista a que foram submetidos Sílvia e Júlio aplicando-lhes o estado de incomunicaçom. Por volta das 13:15 dous carros saem dos garagens da esquadra policial nos que iam Sílvia e Júlio e quatro polícias com passa-montanhas em cada um deles, nesse intre a gente começou a proferir berros em favor dos 2 detidos e abalançaram-se sobre os carros tendo um deles que frear. O destino dos carros eram os calabouços da Audiência Nacional em Madrid. Minutos depois informaram os advogados de que lhes foi concedido o habeas corpus umha vez de que já estavam em caminho dentro dos carros polo tanto sem nenhum sentido e sendo similar a sua denegaçom.
Ficarom auto organizadas jornadas de trabalho para a difusom do acontecido e reclamaçom da liberdade para Sílvia e Júlio, durante toda a tarde forom feitos centos de cartazes e dúzias de faixas que eram coladas por deceas de amigos e companheiros de Ferrol, para mais tarde ter lugar umha concentraçom na Praça Amada Garcia a que assistirom perto de duascentas pessoas, proferirom-se berros em prol da liberdade dos detidos, em contra das montagens policias e criminalizaçom do independentismo por parte dos mass media, assim coma da liberdade dos presos independentistas e o rejeitamento a instituiçom judicial que representa o tribunal de excepçom da Audiência Nacional.
A concentraçom rematou com a intervençom a modo de discurso informativo no qual explicava-se todo o acontecido nas últimas horas e apelando a solidariedade galega, para rematar cantou-se o hino da pátria.
Durante a noite a atividade prosseguiu com mais coladas e numerosas pintadas em toda a cidade.
OURENSE:
Em Ourense realizou-se umha assembleia no centro social Sem Um Cam para organizar o trabalho anti-repressivo dos próximos dias.
A concentraçom na praça do Ferro acodirom 30 pessoas que berrarom consignas reclamando a liberdade d@s detidos e denunciando a repressom espanhola.
Rematou-se cum discurso emotivo dum companheiro e amigo dos detid@s no que animava a combater o medo que nos querem impor este estado fascista e seguir loitando por um futuro próprio.
Depois do discurso cantou-se o hino galego na companha do som de umha gaita.
A faixa da concentraçom foi colocada numha rotunda e pola noite fixerom-se pintadas na cidade.
LUGO:
O Centro Social Mádia Leva foi o lugar escolhido para celebrar a assembleia informativa aberta.
A concentraçom na praça Maior foi secundada por umha decena de pessoas. Nom houvo presença policial nem incidéncias salientaveis.