Nesta semana, o tribunal de excepçom espanhol vem de fazer pública a data para o juízo político a que serám submetidos José Manuel Sanches Gorgas e Santiago Vigo Domingues, militantes independentistas detidos pola ‘Guardia Civil’ no Barbança em 14 de Fevereiro de 2007. O data do processamento de ambos será o vindeiro 2 de Outubro na ‘Audiencia Nacional’. O tribunal espanhol solicita para Gorgas e Vigo duas penas de oito anos de prisom por um delito de “depósito de explosivo”. A vista celebrará-se 1 ano e quase 10 meses depois da detençom de ambos activistas por parte do instituto armado espanhol. Gorgas e Vigo levam, portanto, um tempo similar privados de liberdade e sem juízo em aplicaçom da figura legal que se conhece no Estado espanhol como “prisom preventiva”, que permite a reclusom de militantes que nom fôrom julgados previamente por um período que pode chegar a 4 anos de cárcere. Pouco é o que podemos engadir às informaçons facilitadas no passado dia 2 de Junho em que expugemos a petiçom da Fiscalia espanhola. Apenas destacar que, umha vez fixada a data do juízo, o organismo popular anti-repressivo despregará umha campanha informativa, de denúncia e mobilizaçom focada a dar a conhecer à sociedade galega o processamento em Madrid de ambos independentistas nuns tribunais carentes da mais mínima legitimidade, tanto por serem espanhóis como pola sua condiçom de tribunais políticos de excepçom. Mobilizaçom a Madrid Coincidindo com a celebraçom do processo, Ceivar convocará umha mobilizaçom nacional de solidariedade para arroupar ambos cidadáns galegos e exprimir o rechaço dum sector da sociedade galega ao juízo-farsa a que serám submetidos. O organismo popular anti-repressivo anunciará com a antelaçom necessária os horários e meios para organizar este deslocamento colectivo a Madrid. Mais informaçom no linque anexado ao pé desta notícia.