Dous dias após o Movimento polos Direitos Civis confirmar com documentos internos do corpo repressivo que a ‘Guardia Civil’ desenvolve um labor sistemático de controlo e vigiláncia sobre umha ampla rede de associaçons, colectivos e organizaçons sem obediência institucional e independentes da influência dos partidos ‘mais representativos’, surgem as primeiras iniciativas de resposta à notícia de que os veículos que portam simbologia nacional som controlados polo instituto armado espanhol. Ao reforço da distribuiçom do popular autocolante GZ, acrescentando o número de pessoas ‘identificáveis’ polo instituto armado, soma-se agora a apariçom dum logótipo anónimo a circular pola Internet que vincula a potencializaçom do identificativo nacional com o rechaço à presença da força militar estrangeira que desenvolve funçons de ‘ordem pública’ e controlo social no nosso País. Anexamos esse logótipo na imagem que ilustra esta informaçom e no linque que aparece ao pé da notícia, convidando à sua máxima difusom através de listagens de correio, sítios web e todo tipo de suportes impressos. Frente a quem, conforme é a sua tradiçom e funçom sócio-política, teimam em impor a auto-censura sobre umha cidadania galega que olha como medra a sua consciência nacional, de Ceivar alentamos já nom só a nom recuar, mas a estender as práticas públicas e legais que as FSE pretendem criminalizar abrindo passo a umha persecuçom de milhares de pessoas e umha ampla rede de colectivos sociais e políticos.