Passadas duas semanas desde o ingresso do militante independentista galego Jurjo Rodrigues no centro de menores ‘Los Rosales’, a realidade confirma algumhas das nossas piores previsons: as condiçons de habitabilidade e o tratamento de que som objecto os menores nestes centros penitenciários encubertos evidencia a farsa da “reinserçom” e a “reeducaçom”, pondo a nu o seu autêntico carácter de centros de reclusom e castigo. À imposiçom de espidos integrais aos que é submetido o preso galego após ser visitado polos seu pais, ou incluso polo seu advogado, soma-se agora a colocaçom de várias sançons “por indisciplina”. ‘Los Rosales’ parece ter identificado a interiorizada condiçom de militante político independentista que, apesar da sua juventude, tem Jurjo Rodrigues. A aplicaçom de medidas “reeducativas” nom se fijo esperar. Além dos espidos integrais aos que é forçado cada vez que recebe visitas familiares ou do letrado que o assiste, o jovem independentista foi sancionado em várias ocasions “por indisciplina”, umha vez que se negou a participar em dinámicas que denominam “de educaçom social” e implicam processos de infantilizaçom e despersonalizaçom dos menores reclusos. A privaçom do “tempo de lazer” a que tem direito o jovem é o resultado desta negativa a enquadrar-se nesta dialéctica permanente de “prémios” e “castigos”. Negócio privado Os primeiros 15 dias de internamento de Jurjo Rodrigues em ‘Los Rosales’ indicam já o que poderia ser umha constante no tempo que dure a reclusom do independentista galego: a aplicaçom sistemática dumha repressom destinada a dobregar a sua identidade pessoal e política e o submetimento aos tratamentos que este centro aplica às pessoas menores de idade. Avondando nesta direcçom, familiares e advogado do preso comunicárom ao organismo que as instalaçons de ‘Los Rosales’ fam parte do antigo cárcere de mulheres de Carabanchel, um dado que confirma –por se se precisar- que o centro nom se adequa às características do que, por lei, se define como um centro de menores. Segundo soubemos nesta semana, o centro de menores ‘Los Rosales’ é gerido como umha empresa privada “sem ánimo de lucro” à frente da que se encontram personagens vinculadas, paradoxalmente, ao negócio imobiliário através da fundaçom ‘Respuesta Social Siglo XXI’. Esta companhia beneficia-se da gestom de outros dous centros de menores, para além do citado ‘Los Rosales’, o que nos demonstra, por enésima vez, que a conversom da repressom e os cárceres num negócio avança a bom ritmo no Estado espanhol. Com esta óptica mercantil como bússola, resulta compreensível que estas empresas promocionem o encarceramento de menores e a multiplicaçom do número de centros. Moral alta Apesar das dificuldades que está a enfrontar, assim como das tentativas da instituiçom para reduzi-lo à despersonalizaçom e umha obediência infantil, o jovem independentista galego transmitiu @s familiares um bom estado de ánimo e a firmeza necessária para fazer frente ao tratamento de excepçom de que é objecto. Por sua parte, o organismo popular anti-repressivo está a contactar associaçons e colectivos da capital espanhola comprometidos na denúncia das arbitrariedades que se cometem nestes centros para que qualquer abuso ou violência que se aplique ao patriota galego tenha a máxima repercusom possível na opiniom pública galega e espanhola. Demanda de repatriaçom e envio de correspondência Neste momento, a defesa de Jurjo Rodrigues e Óscar Sanches, ambos detidos pola Polícia espanhola no passado 14 de Janeiro, tem apresentado um recurso contra o auto de prisom dos dous independentistas e realiza as gestons oportunas para exigir a sua transferência a cárceres espanhóis em território galego. Destacar mais umha vez, pola nossa parte, a enorme importáncia de manter um envio massivo e permanente de correspondência aos presos independentistas galegos e, neste momento de especial acossa, ao militante galego Jurjo Rodrigues. ‘LOS ROSALES’: PRISOM DE DE MENORES! DEFENDER A TERRA NOM É DELITO! LIBERDADE PRESOS INDEPENDENTISTAS!