A repressom laboral nas empresas é um dos métodos de disciplinamento político e ideológico mais efectivos existentes na Galiza. Ao carácter generalizado da sua aplicaçom, soma a “invisibilidade” e a forte capacidade para condicionar atitudes por afectar um elemento fulcral para a existência como é o salário. Mais duas operárias da Límia de ‘Antela Estación de Servicio, S. L.’ conheciam em primeira pessoa a repressom sindical trás serem despedidas em 19 de Abril da sua empresa por participarem numha candidatura da central nacionalista CIG. A Uniom Local da CIG de Verim, que denuncia este novo processo repressivo, acusa o empresário de violar o direito fundamental de liberdade sindical das trabalhadoras e da própria central nacionalista. Aliás, detalha o processo seguido para convocar as eleiçons e o despedimento de Olga Rodríguez Gómez e Ana Belén Cuquejo Blanco. O escrito recebido polas operárias no que se rescinde a sua relaçom laboral afirma em espanhol “Sirva la presente para comunicarle que a partir del próximo día 4/05/08, dejará de prestar servicios a esta empresa por despido, quedando extinguida a todos los efectos su relación laboral con la empresa”. Empresa admite a causa do despedimento laboral Dous dias após é o próprio encarregado de ‘Antela Estación de Servicio, S. L.’ que informa às trabalhadoras que “à empresa lhe parecera mal que se filiaram à CIG, polo que já nom podia confiar nelas”. Segundo a central nacionalista, a sequência de evidências fai com que exista umha relaçom causal directa entre filiaçom sindical nacionalista e despedimento que indica “umha conduta antisindical e atentatória ao direito fundamental das trabalhadoras à liberdade sindical”. Além das demandas por despedimento nulo, a CIG impugnará as eleiçons sindicais na empresa limiá. Por parte da Uniom Local da CIG de Verim chama-se “à reflexom a todos os trabalhadores e trabalhadoras que operam no Polígono Industrial de Ginzo da Limia, perto do que está situada a citada gasolineira, de cara a que valorizem a conveniência ou nom de seguir a visitar as instalaçons e serviços dumha empresa que repressalia antisindicalmente os seus próprios operários e operárias”. Pode-se consultar informaçom completa sobre este caso no linque inferior.