No dia de hoje por volta das três da tarde era detido o militante de Xeira, M. Atanes, em Compostela. Umha hora depois a Policía Nacional atuava do mesmo jeito diante da Facultade de Direito da USC com o militante de Agir, A. Curbeira. Ambos fôrom deslocados até dependências policiais e posteriormente postos a disposiçom judicial nos Julgados das Fontinhas.
Para as 17h já estava convocada umha concentraçom diante dos edifícios judiciais reivindicando a posta em liberdade dos jovens detidos. Mais de médio cento de solidárias/os achegárom-se até as portas por onde iam entrar os processados para dar-lhe ànimos e arroupo. A presença policial foi constante mas comedida.
Passadas as sete da tarde era posto em liberdade o militante de Xeira e poucos minutos depois também o militante de Agir. As acusaçons que se vertem sobre eles estám vinculadas ao protesto estudantil acontecido há duas semanas quando Núñez Feijóo dispunha-se a inaugurar umha conferência de ámbito estatal na facultade de Matemáticas e do que finalmente tivo que sair escoltado sem conseguir o seu objetivo.
Os cargos contra os jovens som de “atentado contra a autoridade” e “lesons” polo que estám em liberdade com cargos. Ambos remitírom um trato correto durante as suas detençons.
Desde o Organismo Popular Anti-repressivo CEIVAR nom podemos deixar de denunciar a repressom à que som submetidos os movimentos populares galegos e as contínuas vinganzas policiais das mobilizaçons sociais e políticas. Pola contra também orgulhamos de ressaltar a grande capacidade deste Povo para reagir rápida e coletivamente ante as represálias políticas e exprememos toda a nossa solidariedade com os dous moços retaliados