A solidariedade nom para em Agosto, Este sábado dia 23, Ceivar fai um chamamento a acodir a Vila costeira de Noia para denunciar a repressom numhas das suas formas mais cínicas, a criminalizaçom da solidariedade.
Este ato informativo e de denuncia pretende chamar a atençom do que está a acontecer respeito da solidariedade anti-repressiva, e por volta desta, com os direitos políticos e civís.
Ao longo dos anos a actividade solidária, incómoda para o regime dominante, tem recebido pressons, criminalizaçom e represálias por parte do Estado, mas a tenacidade e a firme determinaçom de homes e mulheres superou pressons e tem feito avançar a solidariedade popular.
Só neste ano forom duzias às provas repressivas superadas grazas ao forte valor solidario que desde o movemento popular temos que seguir demostrando. Desde este ato queremos também parabenizar a inteireza pessoal e coletiva dos centos de solidarios/as que, sofreram ou nom coacçons, imputaçons, etc fam que a palavra de ordem “Solidariedade imparável” cobre todo o sentido.
O cenário dum dos últimos episódios de criminalizaçom e pressons está a ser a vila de Noia. A Guardia Civil, respondendo a critérios ideológicos e através de dispositivos desproporcionados e totalmente desnecessários, trata de criminalizar esta actividade pública na rua, impor o medo e a coaçom na vila e desmobilizar a solidariedade identificando a todas as pessoas asistentes às mobilizaçons solidárias convocadas mensalmente. As pressons do corpo militar chegaram incluso à Casa do Concelho onde a Guardia Civil tratou de coagir à Concelharia de Cultura para proibir a apresentaçom do livro ‘O teito é de pedra’ no salom da Casa da Cultura onde o ato estava registado corretamente. A inteireza do concelheiro eleito permitiu que o ato se desenvolvera com normalidade onde se tinha previsto, e a injerência militar nom tivesse efeito prático.
Neste ato transladaremos aos companheiros e companheiras solidárias de Nóia todo o nosso apóio e toda a nossa força moral para continuarem avante coa solidariedade anti-repressiva e animaremos aos vizinhos e vizinhas a sumar forças junto a eles e elas para lograr que em Nóia nom se poda criminalizar nem perseguir a solidariedade, se denunciem as intromissons policiais no Concelho e se exerça cada vez mais a solidariedade irmandinha.
Sábado 23 de agosto às 12h00 na Praça da Constituiçom (fronte aos julgados). Noia
