A vindeira segunda feira, dia 9 de Junho, quatro pessoas acudirám a partir das 10:30 ao Julgado de Instruçom número 1 de Lugo para declarar por um delito “nom especificado” mas relacionado com ter portado as imagens dos presos independentistas durante a manifestaçom de Galiza pola Soberania que tivo lugar na cidade o passado 18 de Novembro.
No atestado policial recolhem-se singularidades tais como que durante o ato nom se identificou às portadoras das fotos porque som “habituais” polo que os seus dados já estám em maos da Polícia Espanhola. Igualmente tampouco se adjuntam provas gráficas que poidam corroborar os factos ante a juíza que instrue o caso, Pilar Lara, conhecida fervente admiradora das Forças de Seguridade do Estado e ultra católica.
Finalmente só se sinala que se eleva o atestado policial ante o Julgado de Instruçom por se os factos puideram ser considerados de algum tipo de delito relacionado com desordens públicas. Em nengum caso estas quatro pessoas poderiam ser acusadas de “enaltecimento do terrorismo” devido a que o Tribunal Supremo ditaminou há meses que a exhibiçom de imagens de presos nom é constitutivo de delito.
Desde o Organismo Popular Anti-repressivo CEIVAR solidarizamo-nos com as quatro pessoas retaliadas e denunciamos que se cite a declarar sem que se especifique a falta ou delito que supostamente se infringiu assim como que a Polícia maneje “listas pretas” e que se abra umha interpretaçom extensiva de tipo penal no senso da proposta da nova Lei de Segurança Cidadá.