CEIVAR ganha o prémio ao melhor Maio enxebre de Ourense

MAIOS_2014_2Como cada ano, o passado domingo 4 de Maio celebrou-se em Ourense a tradicional festa dos Maios. Este dia realiza-se um concurso no que participam pessoas e coletivos da Cidade das Burgas com a construçom dum Maio tradicional ou artístico e a elaboraçom das coplas, cantigas críticas ou de escárnio da situaçon atual.

Nesta ocasiom, a assembleia comarcal de CEIVAR em Ourense participou cumhas coplas que publicamos ao remate desta nova, e com a criaçom dum Maio enxebre que resultou ganhador na sua categoria. Coma sempre, o prémio acadado será destinado para afrontar a repressom política em todas as suas modalidades e nas que CEIVAR toma parte comprometida.

Novamente, desde CEIVAR queremos agradecer o esforço e apoio solidário de todas as pessoas que ajudarom a elaborar este Maio assim como a gente de EsCuA (Espazo Cultural Alternativo – Ourense) que nos proporcionarom um espaço para a sua elaboraçom.

Obrigadas a todas as que participastes dum jeito ou outro!
Cultura popular contra a repressom!

maios_2014.pdf

 MAIOS 2014 – CEIVAR

Este ano chega o Maio

vem doendo-lhe a cabeça

que nestes tempos de crise

nem chorar nem mamar deixam


Nem chorar nem mamar deixam

caladinhos na casinha!

E a protestar no Facebook

que a rua é da polícia


Que a rua é da polícia

multas até por tusir

e se nom topas acougo

come-te um Tranquimacim


Come-te um Tranquimacim

é o que fica na despensa

e a sonhar que es feliz

na república de Ikea


Na república de Ikea

podes bem viver tranquila

que ali nom vai chegar

radiaçom de Fukushima


Radiaçom de Fukushima

nom me ralhes co de sempre!

Se desgela o Polo Norte

temos praia em Ourense!


Temos praia em Ourense

e sobe a temperatura

nem operaçom bikini

o sol derrete a gordura!


O sol derrete a gordura

e co burato na atmosfera

a depilaçom por laser

vai ser até na cabeça


Vai ser até na cabeça

e juntinhos imos ledos

todos a praia da Antena!

Eu apoio este evento!


Eu apoio este evento

já falamos por “guasap”

que a boca só a temos

pra chupar e pra calar


Pra chupar e pra calar

já falam os jornalistas:

na Ucránia som “rebeldes”

na Galiza “terroristas”


Na Galiza “terroristas”

“e será porque o merecem:

se queimam os Nova Caixa

onde compro as preferentes”


Onde compro as preferentes

uns quartinhos bem rentuados

tardei tanto em aforra-los

como ham tardar em dar-mos


Como ham tardar em dar-mos

a polícia, uns porraços

de novo as da resistência!

Que até Madrid chegarom!


Que até Madrid chegarom

nom che foi cousa de risa

choram os anti-distúrbios

eu que por robots os tinha!


Eu que por robots os tinha

vim que tinham coraçom

 e também tenhem pistola

será pola excitaçom?


Será pola excitaçom

que nos estamos afazendo

a levar umha trás outra

paixom polos carceleiros


Paixom polos carceleiros

a funcionários aspiram

muitos moços dos de agora

já só se correm nas listas


Já só se correm nas listas

sae-che o amor mui caro

botarom-che-me da casa

co condom hipotecado


Co condom hipotecado

faze-mo-la marcha atrás

imos pros anos quarenta

nos direitos laborais.