Três independentistas galegos enfrentam julgamento e 17 anos de prisom

VII_Jornada_RebeliomReproduzimos a seguir a informaçom divulgada pola entidade juvenil independentista Briga. Convocam concentraçom em frente aos julgados de Compostela, polo julgamento a três militantes independentistas por participarem na jornada de luita de 24 de julho de 2011.

8 de novembro: Julgamento a três militantes independentistas por participar na jornada de luita de 24 de julho de 2011.

Simom e Brandám som dous jovens de extremos geográficos opostos: o primeiro provém da Galiza meridional minhota, enquanto o segundo é natural da Galiza marinhá mais setentrional. Graças a BRIGA, à autoorganizaçom juvenil independentista, ambos se conhecem e fam parte dum pequeno setor da mocidade que, consciente da sua opressom, decide organizar-se para fazer frente aos inimigos do povo trabalhador. Som exemplos da Galiza viva que luita, que se reconhece de norte a sul como sujeito nacional de confronto contra o capital e o patriarcado.

Porém, como militantes dumha entidade revolucionária, também conhecem em primeira mao e de forma partilhada a vivência de experiências repressivas. Conhecem-se no orgulho da militáncia, mas também na dureza da repressom. Com apenas 22 e 19 anos, som processados sob acusaçom de graves altercados vinculados à jornada de luita que BRIGA promoveu no dia 24 de julho de 2011. Além dos nossos companheiros, Raúl, um outro militante independentista detido naquela noite do Dia da Pátria também será julgado por semelhantes factos.

As penas solicitadas pola procuradoria, umha instituiçom de natureza política dependente dos partidos do poder, fam referência aos delitos de desordens públicas, danos e atentado à autoridade, nos últimos tempos tam aludidos polo sistema repressivo. Em soma, quase 17 anos de prisom para os três companheiros por reinvindicar dignamente num dia tam assinalado a sua vontade de continuar a ser galegos que nom se resignam à dura realidade que lhes oferece Espanha e o capitalismo.

BRIGA já denunciou no seu dia o jornal espanholista sediado em Compostela El Correo Gallego por ter difundido, no dia 25 de julho daquele ano, umha nova em que atribuia a jovens da nossa organizaçom feitos que nom se produzírom, proferindo graves calúnias que coalham entre os seus leitores e leitoras favorecendo um clima de criminalizaçom que acaba em sérios prejuízos para a juventude independentista.

BRIGA é, na figura destes companheiros, vítima dumha duríssima perseguiçom policial amparada pola procuradoria de Compostela. No dia 8 de novembro começa um julgamento em que BRIGA leva o nome de Simom, Brandám e Raúl. E estes levam na sua pena “de banco de acusados” a resistência da Galiza rebelde que nom vai permitir que nos metam um gol com semelhante desprezo à verdade. É um julgamento político em que o que está em causa é o seu compromisso. O objetivo: acovardar a juventude nesta sinistra maré de miséria com que Espanha se abate sobre as nossas costas.

CONCENTRAÇOM SOLIDÁRIA: 8 DE NOVEMBRO ÀS 09.30h NOS JULGADOS DE COMPOSTELA

NOM À REPRESSOM CONTRA A JUVENTUDE REBELDE!!
SIMOM, BRANDÁM E RAÚL: ABSOLVIÇOM!!