A activista de Equanimal Olaia Freiria ingressada na prisom de Teixeiro.

olaia-1
A activista viguesa fora detida na quarta-feira junto a Eládio Ferreiro, Sara Lago e Rafael Romero nas localidades de Vigo e Gondomar num operativo policial contra o activismo em defesa dos animais. No resto do estado espanhol foram detidas mais sete pessoas. A polícia acusa-os de delito ambiental, invassom de local, associaçom ilítica e danos pola suposta participaçom na ceiva de visons de granjas da indústria peleteira. Depois de prestarem declaraçom nos julgados de Compostela onte, o juiz Vázquez Taín decretou prisom preventiva para Olaia Freiria em base a supostos antecedentes policiais da activista. O resto das pessoas que passaram a disposiçom judicial foram postas em liberdade com os cargos anteriormente citados tendo que se apresentarem nos julgados periodicamente. O resto dos activistas processados serám passados a disposiçom judicial no dia de hoje.

Do movimento animalista e de defesa dos animais, e mesmo alguns dos próprios detidos à saída dos julgados, está-se a denunciar a montagem jurídico-policial promovida pola indústria peleteira contra aquelas pessoas e colectivos que se destacam na investigaçom e denúncia das práticas crueis e inumanas de dita industria. Afirmando que as pessoas detidas som cabeças de responsáveis polas perdas milionárias ocasionadas a industria peleteira polo activismo legal mas sobretudo polas acçons ilegais como a ceiva de vissons ou os ataques às próprias instalaçons peleteiras. As pessoas detidas estám a realizar umha greve de fame contra esta montagem e em reclamo da sua liberdade. Casos como este ponhem de evidência a crescente perseguiçom, criminalizaçom e repressom dos movimentos e o activismo social por parte do poder político respondendo aos interesses económicos que o guia.

De Ceivar queremos denunciar o tratamento policial, judicial e mediático que estám a sofrer estes activistas. No que mais umha vez se dilapida a presunçom de inocência, invadem-se moradas e o mais grave, decreta-se a prisom preventiva. Tratamento que contrasta coa indulgência dispensada a verdadeiros terroristas ambientais que se dedicam a especular, destruir, contaminar e intoxicar os nossos rios, o nosso mar, o nosso meio natural, a nossa Terra, no marco deste sistema depredador e explorador chamado capitalismo.

Aliás queremos mostrar a nossa solidariedade com os activistas processados, especialmente com os nossos paisanos Eládio e Rafael e as nossas paisanas Sara e Olaia. Enviando um fortíssimo abraço a Olaia Freiria no seu seqüestro legal imposto pola justiça espanhola.

STOP REPRESSOM!!