Mas umha nova sançom económica desproporcionada

Justica

O Estado segue a máxima da repressom de “baixa intensidade” por medio da sangria económica a ativistas tanto individuais como coletivos. Nom é o primeiro caso que sofre o C.S. A Gentalha do Pichel de sentências arbitrárias e desmesuradas como entidade sócio cultural Compostelá, desta volta a sançom elévase a 3000€ por pintar um “m” sobre um “n” num sinal de indicaçom de “Boqueixón”, com um rotulador. Sem fazer um grande esforço de capacidade memorística temos os antecedentes sancionadores que lhe aplica a cámara Municipal de Compostela por pendurar umha faixa onde se reivindicava a normalizaçom da língua galega na cacharela de sam joám, esta ascende a um montante total de 1500€, a pesares de ter tramitada a petiçom para poder afixar cartazes e faixas, mas o Concelho nom respostou, e umha outra a mesma noita por exceder supostamente a hora permitida de 300€. Assim como a obriga baixo ameaça de feche do local de instalar um elevador (custe 10.000€) em menos dum mês, quando é sabido e constatado que a inmensa maioria de locais (inclisives os da própria administraçom) carecem nom só dum elevador senom das mínimas condiçons de acessibilidade para pessoas com minusvalias físicas.

Som só exemplos locais dumha realidade que se estende polo Pais, umha realidade da repressom com objetivo de minar as capacidades económicas e anímicas individuais ou coletivas da sociedade galega mais coherente e combativa. Sem esquecernos que detrás disto atopamos umha estratêgia planificada por parte das estruturas do Estado de intosicaçom e criminalizaçom de todos aqueles setores que luitam pola dignificaçom do povo galego.

CONTRA A SUA REPRESSOM O NOSSO TRABALHO!!

Texto reemitido por A Gentalha do Pichel:

Multa de 3.000 euros por pintar um *eme* final a *Boqueixom*

Conduzir a 200 à hora? Ir fazendo esses duplos pola estrada depois de ser expulso de umha discoteca por causa de umha bebedeira antológica? Guiar umha carrinha escangalhada a contramao que nom passa a ITV há duas décadas? Nom, por nengumha dessas infracçons se pagam 3.000 euros neste país. O motivo polo qual a Gentalha do Pichel volta a ser alvo de umha multa recorde, e já vam umhas quantas, é por ter pintado um *eme* sobre o *ene* de Boqueixom:com um rotulador! Nom cabe dúvida que nos encontramos perante um grave delito contra a segurança viária. Onde se viu? Desde que foi cometido, fôrom inúmeras as pessoas que, querendo ir para *Boqueixon*, e nom encontrando o desaparecido topónimo, seguírom a estrada e fôrom dar a sabe Deus onde.

Claro que o delito sempre pode ser amplificado, neste caso: “Instalar, retirar, trasladar, ocultar o modificar la señalización en una via sin permiso y sin causa justificada”. Nom é algo ao que nom nos vaiamos habituando, fique claro, numha terra em que pôr um *eme* a Boqueixom sai mais caro que desconjuntar um petróglifo. E assim, aos poucos, a liberdade de expressom vai-se afogando, entre Leis de Segurança Vial e Ordenanças Municipais de Meio Ambiente.

O preço é elevado, é verdade, mas nós e muitos mais ativistas pola língua encarregaremo-nos de amortizá-lo. Amanhá, como ontem, continuarám a aparecer letras galegas nas estradas.

A Gentalha do Pichel