Nesta passada sexta-feira 50 pessoas concentrárom-se ante o mercado do bairro viguês do Calvário para exigir mais umha vez repatriaçom e liberdade para os três independentistas galegos que actualmente se encontram em prisom. A concentraçom prolongou-se durante mais de umha hora que @s solidári@s aproveitárom para repartir 600 folhas informativas denunciando ante a vizinhança viguesa o cenário de repressom total que enfrontam Óscar Sanches, Ugio Caamanho e Jurjo Rodrigues nos cárceres espanhóis de Soto del Real (Madrid), Teixeiro e o “centro de menores” Los Rosales de Carabanchel (Madrid). A brochura repartida por Ceivar, depois de denunciar a satanizaçom informativa à que estám submetidos estes militantes políticos, assinala que “há quem neste País entende que Rodrigues, Sanches e Caamanho nom som ‘terroristas’ e opina que o comportamento de que os acusam, apesar de tipificado como delitivo nas leis, está motivado por causas nobres e altruistas que levam os três a assumirem altos custos pessoais na luita pola independência”. Após reivindicar a condiçom de prisioneiros políticos para os três repressaliados, o organismo exige às autoridades espanholas “que reconheçam esta condiçom” e convida a sociedade galega a “achegar cada quem o seu grau de areia para a defesa dos patriotas presos”. Após a concentraçom, 39 pessoas participárom numha Ceia de Solidariedade com os presos independentistas galegos no centro social Faísca. Iniciativas comarcais Os actos celebrados no Calvário fam parte dumha série de iniciativas informativas e económicas que está a por em andamento o organismo popular anti-repressivo em diversas localidades galegas para, por umha parte, manter a tensom social e a solidariedade sobre a existência de independentistas galegos presos nos cárceres de Espanha e, por outra, recadar fundos para enfrontar os gastos de todo o tipo –pagamento de advogados e procuradores, ediçom de material informativo, convocatórias, etc.- que ocasiona esta forma de repressom que o Estado aplica ao movimento independentista. LIBERDADE PATRIOTAS GALEGOS! DEFENDER A TERRA NOM É DELITO!