‘Comissom Anti-violência’ converte a solidariedade com os independentistas presos em “exaltaçom do terrorismo”

A ‘Comisión Nacional contra la Violencia en los Espectáculos Deportivos’ é um organismo dependente do ‘Ministerio de Interior’ cuja funçom formal é perseguir e punir actos de “violência”, “racismo”, “xenofobia” e “intoleráncia” nos espectáculos desportivos. No entanto, além dos objectivos com que se legitima publicamente, é sobretodo um instrumento político policial que aplica a censura e a repressom nos estádios. A recente imposiçom a dous siareiros galegos de sançons por valor de 5000€ demonstra, mais umha vez, qual é o jogo a que joga este organismo. “Exaltaçom do terrorismo” é o delito que a ‘Comissom Anti-violência’ atribue a duas pessoas que, durante o jogo Celta – Real Sociedad, participárom com um numeroso grupo de siareir@s no despregamento dumha estensa faixa com a legenda ÓSCAR E XURXO LIBERDADE assinada por umha bandeira da Pátria. O informe policial que argumenta a sançom assegura que, aliás, @s siareir@s “interrompérom o tránsito rodado nas imediaçons do estádio”, alargando o braço punitivo da Comissom incluso fora do recinto desportivo. As sançons incluem a proibiçom do acesso a qualquer recinto desportivo durante dous anos e seguirám o trámite habitual. Já nom é a primeira ocasiom em que por parte do organismo policial se intervém contra a liberdade de expressom nos estádios, criminalizando reivindicaçons populares e tratando de que desaparezam dos eventos desportivos. Assim, neste portal já temos denunciado casos similares em Passarom –por exigir a retirada da Brilat-, ou no próprio estádio de Balaídos, onde solidários com o Curdistám foram sancionados pola “Comissom Anti-violência”. Escarmentar a solidariedade com os presos independentistas Nesta ocasiom, a intencionalidade política da medida aparece clara: converter as manifestaçons de solidariedade com os presos independentistas em alvo da acçom policial, judicial e administrativa e eliminar a sua expressom nos encontros desportivos. A notoriedade que alcançam determinadas reivindicaçons ao serem expostas em estádios aos que assistem milhares de pessoas e onde, em casos, incluso tenhem transmissom televisada, é algo que nom é do gosto do ‘Ministerio de Interior’. O seu tentáculo nestes espaços públicos já adoptou medidas de intervençom. De Ceivar queremos parabenizar desde este portal os siareiros e siareiras do R. C. Celta de Vigo, exemplo de solidariede com as luitas mais diversas e, especialmente, contra a repressom. Temos a certeza de que nem Rubalcaba nem Delfín Fernández serám capazes com todos os seus meios de impedir que em Balaídos se siga a escuitar a reivindicaçom de liberdade para os três patriotas galegos que se encontram nas prisons espanholas. LIBERDADE INDEPENDENTISTAS! ADIANTE A SOLIDARIEDADE COM OS PRESOS! DELFÍN FERNÁNDEZ REPRESSOR DO POVO!