O arresto policial de Óscar Sanches e Jurjo Rodrigues e a sua posterior conduçom a Madrid e encarceramento disparárom mais umha vez as visitas à página web do organismo popular anti-repressivo, evidenciando que o pequeno meio informativo gerido pola militáncia de Ceivar joga um papel referencial quando se tratar de dispor de informaçom fiável relacionada com processos repressivos. Vários meios empresariais recabárom aqui dados e informaçons quando as agências espanholas Efe e Europa Press e a ‘Dirección General de la Policía Nacional y la Guardia Civil’ ainda nom determinaram os conteúdos que deviam difundir. Desta referencialidade objectiva dam testemunha as nossas estatísticas. Por exemplo, sendo a média do portal neste mês de Janeiro de 494 visitas diárias, este dígito disparava-se no dia 14 –detençom na madrugada- a 1113 visitas e no dia 15 –unánime criminalizaçom mediática, ingresso no cárcere e concentraçons contra a repressom- a 1384. O número de IPs diferentes –número identificativo de cada computador- que acedêrom ao web foi, respectivamente, de 785 e 988. Fonte de dados Do mesmo modo, quem tivérom extremo cuidado em silenciar a existência dumha ampla campanha informativa em todo o País e a celebraçom de concentraçons de apoio aos detidos nos principais núcleos urbanos, nom pugérom pejas para tomar dados do nosso portal. Assim, por exemplo, vários meios ‘oficiais’ publicavam nomes concretos quando os telétipos das agências de imprensa que nestes dias subministrárom a “informaçom” –nomeadamente, Efe e Europa Press- ainda nom deram notícias ao respeito.