A mobilizaçom de solidariedade com os independentistas detidos na madrugada de onte em Salcedo activou-se nos principais núcleos da Galiza em apenas 36 horas desde que começou a circular a notícia da detençom. A participaçom de quase 250 solidári@s nas cidades galegas estivo acompanhada em todos os casos do controlo policial explícito ou através de polícias à paisana. No entanto, as FSE nom provocárom incidentes ressenháveis além de seguimentos e controlos. Oferecemos a continuaçom umha breve sinopse do decurso das mobilizaçons em todo o País, à vez que os nossos sinceros parabéns às dezenas de homes e mulheres que figérom possível a dinámica solidária das últimas 40 horas. VIGO A concentraçom mais numerosa produziu-se na cidade olívica da que som naturais ambos detidos. 120 pessoas reunírom-se frente às instalaçons do Museu Marco nas que se convocara a concentraçom. As pessoas mobilizadas deslocárom-se posteriormente pola rua do Príncipe, Porta do Sol e Praça da Vila onde se deu por rematado o acto solidário trás a leitura do comunicado de Ceivar. Quatro furgonetas de agentes ‘antidistúrbios’ situárom-se em ruas próximas da mobilizaçom simultaneando labores de vigiláncia com agentes à paisana. Ausência de meios comerciais durante todo o acto apesar de ser o de maior dimensom quantitativa em todo o País. Apontar, como um dos dados mais ressenháveis, a atitude solidária mantida polo centro social Faísca, que suspendeu a sua programaçom de actividades para chamar as suas sócias e sócios a participarem na concentraçom. COMPOSTELA 55 pessoas concentrárom-se na Praça do Toral para reivindicar a liberdade de Jurjo Rodrigues e Óscar Sanches. A continuaçom dirigírom-se em marcha até a Praça do Pam (Cervantes) fazendo umha paragem de 20 minutos ante as instalaçons do diário ultraconservador ‘El Correo Gallego’ e denunciando a intoxicaçom informativa dirigida desde a ‘Delegación del Gobierno de España’ à que, mais umha vez, se emprestou o jornal da capital galega. Umha unidade de efectivos ‘antidistúrbios’ que, segundo parecer, foi solicitada polo próprio diário ante a presença d@s manifestantes, personou-se no lugar e acompanhou est@s até a Praça do Pam onde se leu o comunicado do organismo popular anti-repressivo e se coreárom consignas contra a repressom e em favor dos militantes encarcerados. Como é costume, as câmaras de vídeo-vigiláncia da Polícia Local registárom o decurso da mobilizaçom PONTE VEDRA 22 pessoas assistírom à convocatória de Ceivar na cidade do Leres. Segundo informam companheiros do organismo popular anti-repressivo, agentes policiais à paisana situados nas proximidades tirárom fotografias das pessoas que se solidarizárom com os já presos independentistas galegos. Importante presença de meios. CRUNHA Concentrárom-se 18 pessoas na Praça do Obelisco ante o seguimento cercano dum carro da Polícia espanhola e de agentes da Polícia Local, sem que em nengum momento se produzisse a sua intervençom. Resenhar também a presença nesta concentraçom de vários meios de comunicaçom. LUGO À mobilizaçom de Lugo assistírom 10 solidários e solidárias que empapelárom com cartazes informativos as ruas da cidade. Um carro da Polícia espanhola aparcado numha praça peonal fijo o seguimento do acto além de agentes à paisana. Reparto de volantinas informativas e nula presença de meios de comunicaçom. OURENSE 15 pessoas reunírom-se sob a chuva frente à ‘Subdelegación del Gobierno de España’ em Ourense para exprimir a sua solidariedade com os militantes encarcerados e exigir a sua liberdade. A concentraçom prolongou-se durante 45 min. Três patrulhas da Polícia espanhola, além de agentes à paisana, gravárom a distáncia o decurso do acto. Nom se produzírom identificaçons. FERROL Na comarca de Trasancos reunírom-se 13 pessoas sob a vigiláncia de duas patrulhas policiais e 6 agentes que procedérom à identificaçom individualizada de tod@s @s assistentes. Cantou-se o nosso hino nacional após a leitura da comunicaçom do organismo.