Polícia espanhola pratica registos domiciliários nas moradas dos independentistas detidos

[Últimas informaçons] Efectivos da Polícia espanhola em Ponte Vedra deslocárom-se na tarde de hoje até a cidade de Vigo para praticar registos domiciliários nas moradas de Jurjo R. O. e Óscar S. B. (este é o nome da segunda pessoa detida, segundo parece confirmar-se por volta das 19:00 h. da tarde). O domicílio de Óscar S. B. foi registado a primeira hora enquanto o de Jurjo R. O. fazia-o por volta das 18:00 aprox. Ambos militantes acompanhárom os agentes policiais à prática dos registos e estivérom assistidos polo advogado nomeado por ambos. Informaçons solventes achegam aliás umha boa notícia e indicam que foi levantado o regime de incomunicaçom que pesava sobre Óscar S. B. No entanto, desconhece-se às 19:20 h. qual pode ser o destino final de ambos jovens independentistas. A possibilidade dumha conduçom aos julgados de excepçom da ‘Audiencia Nacional’, e incluso o ingresso em prisom preventiva, nom som opçons descartadas em absoluto mesmo no caso do companheiro que é menor de idade. Juízo mediático Simultaneamente à evoluiçom do caso a nível policial e judicial, os principais meios de comunicaçom que operam na Galiza administrativa já procedérom, seguindo o protocolo de rigor, a realizar um inapelável juízo mediático fundamentado exclusivamente sobre a informaçom que facilita a ‘Dirección General de la Policía y la Guardia Civil’ através de agências amigas e livre de qualquer “aderência extranha” provinte de familiares e amig@s dos detidos ou do movimento de solidariedade que nestas horas se desenvolve nas principais cidades galegas. A condiçom de “independentistas” que se atribue a ambos detidos é, segundo parece, muito mais que os factos objectivos em si próprios, o sinal que define se estes factos constituem ou nom um “delito de terrorismo” e define o tratamento policial, judicial e penitenciário a aplicar. Evidentemente, isto já nom surpreende ninguém habituado aos manejos policiais, judiciais e mediáticos associados ao tratamento da “contorna do movimento independentista galego” –segundo a gíria policial e jornalística-, mas resulta um indicador claro de que a motivaçom sócio-política existente detrás da comissom de acçons ilegais é a ‘marca’ que diferencia um vulgar infractor das normas legais dum “terrorista” sobre o que, segundo umha frase célebre, “deve recair todo o peso da lei”. Mobilizaçons de solidariedade Em diversas localidades galegas estám convocando-se para amanhá concentraçons informativas e de solidariedade com os independentistas detidos. Por sua vez, desenvolve-se umha campanha de informaçom à cidadania galega à margem das notícias e dados que estám a facilitar as empresas de comunicaçom. Neste portal ofereceremos em breve cumprido detalhe de horas e locais enquanto ambos se vaiam perfilando nas próximas horas. Animamos a umha assistência massiva aos actos que se programem em todo o País para exigir a liberdade de Jurjo e Óscar. LIBERDADE PATRIOTAS GALEGOS! STOP PRISOM, STOP REPRESSOM!