Organizam umha marcha anti-carcerária até os muros da prisom espanhola de Teixeiro

Neste sábado 19 está convocada umha nova ediçom da marcha anual que diversos colectivos anarquistas convocam até o macro-cárcere de alta segurança de Teixeiro. A mobilizaçom partirá às 18:00 h. da gasolineira situada no lugar dos Morangueiros, a dous km. aproximadamente do centro penitenciário. Nestes dias, diversas urbes galegas aparecêrom empapeladas com cartazes que chamam à participaçom nesta manifestaçom em favor da aboliçom do sistema carcerário. O protesto coincide com distintas incidências que afectam os presos e presas políticas nesta prisom. A marcha a Teixeiro coincide com um momento especialmente tenso nas relaçons entre o Colectivo de Presos e Presas Políticas Bascas (EPPK) recluidas nesta prisom e a direcçom do centro penitenciário. A causa do conflito é a vontade da 62 directiva que preside a madrilena Silvia Alonso Donis de aplicar apalpamentos corporais aos parentes d@s pres@s basc@s para permitir o seu acesso aos vis-à-vis. Recordamos também que neste centro se encontra o preso independentista galego Ugio Caamanho Sam-Tisso, que provavelmente será objecto das mesmas medidas de excepçom que a direcçom de Teixeiro pretende aplicar ao EPPK. O deslocamento a Teixeiro realizará-se em carros particulares. Anunciamos a única cita de que tivemos conhecimento à hora de redigir-se esta informaçom: saída às 16:00 h. desde a estaçom de autocarros de Compostela situada na Avenida Rodríguez de Biguri.