Gloria Lago denuncia um independentista por participar em actos em defesa da língua e oposiçom a ‘Galicia Bilingüe’.

Os verdugos deste País procuram aparecer sempre como vítimas. É o caso da presidenta da associaçom supremacista espanhola ‘Galicia Bilingüe’, María Gloria Lago Cuadrado, mediaticamente conhecida como Gloria Lago. A porta-voz habitual da entidade que defende o extermínio definitivo do galego denunciou em 21 de Março na esquadra da Polícia espanhola em Vigo Aurélio L., membro do Foro da Mocidade de Vigo, acusando-o de participar na contestaçom nacional a GB no passado 8 de Fevereiro e em actos de promoçom da língua nacional e rechaço a esta associaçom manejada pola fundaçom fascista FAES, que preside o ex-presidente do governo espanhol José María Aznar. Mas nom ficam por ai as acusaçons da Gloria Lago, a presidenta de “Galicia Billingüe” no seu delírio cínico acusa Aurélio L. dum delito contra o exercício dos direitos fundamentais e as liberdades públicas e doutro de coacçons. Lago achega à Polícia espanhola várias fotografias do militante independentista participando em manifestaçons e actos de protesto em defesa da língua e contra a entidade que ela preside, assim como ligaçons a TVs espanholas que retransmitem manifestaçons em idêntico sentido. A informaçom oferecida pola professora do licéu Sam Tomé de Freixeiro de Vigo inclui elementos parapoliciais e delata que sobre este jovem existe um seguimento continuado e a sua localizaçom personalizada em distintas mobilizaçons contra os partidários do extermínio do nosso idioma. Múltiplas acusaçons Em oito fólios de denúncia inçados de imagens em que se assinala Aurélio L., Gloria Lago mestura “acusaçons” de activismo no movimento normalizador de base com actuaçons ilegais das que acusa o jovem indepedentista sem apresentar nengum tipo de prova que incrimine o denunciado. Todo isto num totum revolutum onde aparecem brochuras independentistas, links a webs de organizaçons e chamamentos do Foro da Mocidade de Vigo à mobilizaçom. Finalmente, Lago atribui a Aurélio L. delitos “contra o exercício dos Direitos Fundamentais e das Liberdades Públicas”, “contra a orde pública” e “coacçons”.Aliás, a presidenta de GB aponta num absurdo tom acusatório que Aurélio L. “poderia aparecer vinculado ou relacionado com a organizaçom radical AMI” e indica também à Polícia espanhola que o jovem “parece pertencer” ao Foro da Mocidade de Vigo, organizaçom juvenil que impulsiona nos últimos anos as principais dinámicas reivindicativas do galego entre a juventude e o estudantado viguês. Continuando o seu delírio, além da completa e correcta identificaçom do militante independentista, solicita como medida preventiva a proibiçom ao membro do Foro da Mocidade de Vigo de se aproximar da representante legal de Galicia Bilingüe, Maria Gloria Lago Cuadrado, em qualquer lugar onde se encontrar. Por sua parte, Aurélio L., que foi insultado e fotografado por Lago em diversas ocasions quando participava em actividades de defesa da língua no liceu Sam Tomé de Freixeiro, assessorado por advogados de Ceivar apresentou denúncia “por acossa” no julgado nº 1 de Vigo. A cruzada contra o idioma galego “Os pido que hagais de esto una cruzada”, com esta frase encerrou Gloria Lago a apresentaçom de Galicia Bilingüe em Vigo. Referia-se ao impedimento da normalizaçom do idioma galego e a conseguinte supremacia lingüística castelhana. Muito ao seu pesar e mália a sua política estar sendo implementada polo PP desde o governo da CAG, este povo dá mostras de madurez no que a questom lingüística di respeito, protagonizando múltiplas e multitudinárias manifestaçons em prol da língua galega. Mas a particular cruzada de Maria Gloria Lago Cuadrado continua, agora no plano repressivo, de ariete da polícia e a judicatura espanhola, e desta volta nom exclussivamente contra o nosso idioma, também contra as galegos que como Aurélio L. se estám a movimentar de forma activa em defesa da língua galega. Deste lado da trincheira, na que nos situamos os defensores e defensoras do nosso idioma, a gravidade do assunto nom pode deixar ninguém indiferente. SOLIDARIEDADE COM O AURÉLIO!! STOP REPRESSOM ESPANHOLA!! ADIANTE A DEFESA DA LÍNGUA!!