“A ideia é localizar os infractores e actuar contra eles através da abertura de expedientes sancionatórios”. Quem assim se exprimir nom é o mediaticamente onipresente e odiado Delfín Fernández, ‘Subdelegado del Gobierno de España’ em Ponte Vedra, sempre disposto a afogar em violência económica e policial qualquer conflito ou protesto social, mas o Tenente de Alcalde de Vigo e concelheiro de Comércio polo BNG, Santiago Domínguez, que incorpora ao seu repertório os leit motivs do discurso oficial para a criminalizaçom da expressom pública independentista. Domínguez anunciou hoje no rotativo espanhol ‘La Voz de Galicia’ a abertura dumha “investigaçom” para descubrir os autores de pintagens aparecidas em vários pontos da cidade olívica nesta fim-de-semana coincidindo com a celebraçom do Dia da Galiza Combatente. O Tenente de Alcalde do BNG, que também se aponta ao discurso do “vandalismo” e a “defesa do património”, explicou ao citado diário que “a ideia” é “localizar os infractores e actuar contra eles” por meio da abertura de expedientes sancionatóris. Domínguez nom concretou, no entanto, a que meios pensa recorrer para lograr ambos objectivos. A vontade expressa do Tenente de Alcalde viguês já nom surpreende ninguém: encaixa à perfeiçom na prática à que há anos se apontou certo colaboracionismo autóctono consistente em procurar respetabilidade e votos incorporando-se à “caça ao independentista”. O que sim merece destacar-se é que esta política sistemática de acossa em nengumha cidade galega logrou os seus objectivos e apenas serviu para acrescentar o envilecimento de quem se subírom ao carro, subordinando-se a umha estratégia que é plenamente funcional à da ‘Delegación del Gobierno de España’.