Já há data para o recebimento popular aos ex presos independentistas Santiago Vigo Domingues e José Manuel Sanches Gorgas. Ambos militantes galegos serám homenageiados no próximo sábado 17 de Outubro às 20:00 h. na Praça do Toral de Compostela depois de 659 dias privados de liberdade. A publicaçom da sentença da ‘Audiencia Nacional’ que os condena a 365 dias de prisom demonstra, mais umha vez, ao igual que no caso anterior de Giana Gomes, que o tribunal de excepçom e a ‘Dirección General de Instituciones Penitenciarias’ prolongárom o tempo de cárcere de ambos militantes por cima da condena fixada finalmente. Regressados para a Terra na madrugada da passada terça-feira, Gorgas e Vigo serám objecto dum recebimento e homenagem nacionais depois da passagem polas prisons espanholas e a imposiçom do regime de dispersom que estendeu a repressom e a estratégia de desgaste económico a familiares, amig@s e militáncia independentista. Os activistas galegos exprimírom a este portal a sua satisfacçom polo retorno à Terra e manifestárom a sua decisom de continuar participando activamente na luita colectiva pola liberaçom nacional e social do nosso País. Sentença pública Gorgas e Vigo fôrom condenados polo tribunal de excepçom por um “delito de danos em grau de tentativa” (art. 266 do Código Penal espanhol) do que se afirma que tinha “finalidade terrorista” (art. 577). Esta caracterizaçom é referida àqueles actos ilegais que procurariam “a alteraçom da ordem constitucional” vigente. A pena imposta, à espera de eventuais recursos e da sua consideraçom polo tribunal especial, é de 1 ano de prisom e 7 de inabilitaçom especial para o direito de sufrágio passivo e inabilitaçom absoluta. Mais umha vez, o resultado final do processo a que fôrom submetidos ambos, com acusaçons iniciais por parte da ‘Guardia Civil’ e os meios de “integraçom” numha imaginada “banda armada”, excede notavelmente o tempo em que Vigo e Gorgas estivérom presos e deportados: as autoridades espanholas “devem” portanto a ambos galegos 294 dias de vida em liberdade. Os nossos advogados exigirám por via legal as correspondentes (e impagáveis) indenizaçons, projectando chegar ao Tribunal Europeu de Direitos Humanos, umha vez que é sabido que este tipo de recursos som sistematicamente desconsiderados no Estado espanhol. Agradecimento a todos e todas De Ceivar, além de convidar à assistência a esta homenagem nacional, queremos agradecer a todos aqueles homes e mulheres, colectivos sociais e organizaçons que nestes 659 dias de sequestro demonstrárom desde o silêncio e a efectividade, cada quem com o seu pequeno grau de areia, que entre nós a solidariedade é muito mais do que umha palavra oca expropriada pola retórica do oenegeísmo reinante, e que verificárom, por enéssima vez, que a saúde dessa solidariedade é ótima quando de que se trata é de defender e reconhecer a quem se encontram atrapados e atrapadas nas gadoupas da besta. Podem impor-nos todo tipo de arbitrariedades e sufrimentos. Mas serám incapazes de ajeonlhar a nossa vontade colectiva. SÁNTI, JOSE, BEM-VINDOS À TERRA! A LUITA CONTINUA!