Afinal sempre é pola força, do Salgueirom até Canedo, a ‘Guardia Civil’ utiliza a violência para facilitar o desenvolvimento de obras cuja legalidade é mais que duvidosa. Efectivos do instituto armado espanhol carregárom nesta manhá contra vizinh@s de Canedo (Ponte Areias) que ocupavam desde onte as obras ilegais de construçom dumha rotunda no acesso da N-120 à sua parróquia e a Sam Vicente. Os agentes do instituto armado espanhol despejárom o campamento vizinhal e praticárom sete detençons entre as que se encontra a do dirigente vizinhal Luís Pardo. Há várias pessoas contusionadas. Umha mulher de avançada idade sofreu um ataque de epilepsia. A violência policial foi o argumento supremo com o que se desbloqueou temporalmente nesta manhá o desenvolvimento dumha obra da que, segundo declarava recentemente o dirigente vizinhal Luís Pardo, “nom recebemos a informaçom técnica por nós demandada nem se nos apresentou nengumha licença que autorize dita construçom”. Os vizinhos e vizinhas exigem a paralisaçom da infraestrutura, assim como a reposiçom ao estado inicial do entorno intervido “até que os técnicos e mais os responsáveis do Ministério saibam como se tem de executar”. Da ilegalidade da rotunda a construir no acesso da N-120 a ambas povoaçons a vizinhança responsabiliza o governo municipal de Ponte Areias “por nom atrever-se a exigir ao Ministerio de Fomento o cumprimento da legalidade, consentindo que se realizem obras atentando contra a legalidade em matéria de ambiente e urbanismo”. A resposta do colectivo foi acampar desde a tarde de onte no lugar onde se constrói a rotunda, estabelecendo quendas para evitar que as máquinas retomem o projecto dado que “a abertura dum expediente às duas empresas que realizam a obra por parte da Confederaçom Hidrográfica é razom suficiente para a sua paralisaçom”. Cárregas brutais e sete detidos No entanto, a previsom de realizar quendas de vigiláncia para evitar a continuidade das obras veu-se frustrada sobre as 10:30 h. da manhá quando dezenas de indivíduos armados desalojárom violentamente a vizinhança de Canedo. A ‘Guardia Civil’ praticou sete detençons ficando tod@s @s detid@s livres na tarde de hoje. Desconhecemos por que cárregos fôrom imputados. Dous dos detidos, que já estám também em liberdade, fôrom conduzidos ao quartel do instituto armado em Salvaterra de Minho. Para as 20:30 h. da tarde está convocada umha concentraçom vizinhal em Ponte Areias em solidariedade com @s retaliad@s, de condena da actuaçom do corpo repressivo espanhol e para exigir que se suspendam as obras ilegais. Mais informaçom e imagens na ligaçom a A Peneira situada ao pé desta informaçom.