Antom Árias Curto receberá umha merecida homenagem a umha vida de militáncia e luita pola liberaçom nacional da Galiza

Antom Árias Curto (Terra de Lemos, 1944) é o nome dum histórico militante galego que precisa poucas apresentaçons. Activista incansável desde a luita clandestina na Longa Noite de Pedra até os projectos e iniciativas independentistas mais recentes, na biografia de Antom salienta a participaçom como co-fundador de organizaçons armadas independentistas como Loita Armada Revolucionaria (LAR) e o Exército Guerrilheiro do Povo Galego Ceive (EGPGC) que, em distintos momentos históricos, desafiárom e combatérom os poderes políticos e económicos implicados no espólio colonial da Galiza e escrevérom páginas inteiras da História de resistência deste País. Produto desse compromisso e dessa militáncia independentista incansáveis desenvolvidos durante largos períodos sob os constrangimentos da clandestinidade e o cárcere, a vida deste jovem de 65 anos fijo-se digna do reconhecimento de jos_content geraçons de militantes que, no próximo 4 de Julho, organizarám umha homenagem nacional a quem pujo e pom a sua vida ao serviço do projecto dumha Galiza liberada. O acto celebrará-se no Local Social Faísca (Vigo) a partir das 20:00 h. desse dia e contará com actuaçons musicais e a participaçom dum amplo leque de pessoas que partilhárom com ele projectos, luita e companhia. Evitaremos fazer aqui umha biografia extensa e dificilmente sintetizável: o objectivo da informaçom é apenas dar a conhecer com a antelaçom necessária aos milhares de pessoas que dia a dia trabalham na defesa e a construçom nacional deste País que no dia 4 de Julho de 2009 temos umha cita colectiva para render o reconhecimento merecido a um luitador galego exemplar e a um dos construtores da história do independentismo galego contemporáneo. O correio para anotar-se à ceia homenagem a celebrar em 4 de Julho é homenagemcurto@gmail.com. A organizaçom do acto responde à iniciativa dos sócios e sócias dos locais sociais Faísca e Revolta de Vigo.