Efectivos de diversos corpos policiais empregam-se a fundo na capital para invisibilizar mais umha vez qualquer sinal de dissidência política. Neste caso, trata-se de impedir que a campanha eleitoral da candidatura Iniciativa Internacionalista- A Solidariedade entre os Povos tenha expressom nos espaços públicos. Finalmente, a ilegalizaçom que nom decretou o ‘Tribunal Constitucional’ de Espanha parece que pretendem impo-la pola via dos factos os corpos policiais espanhóis deslocados na capital galega. Assim, vulnerando mais umha vez o exercício da liberdade de expressom, fontes que preferírom ficar no anonimato denunciárom a este portal que efectivos da ‘Guardia Civil’ no Milhadoiro e da Polícia Local de Compostela no Polígono do Tambre e na rotunda de Vidám procedérom a retirar em menos de 24 horas três faixas de vários metros em que se pedia o voto para a candidatura apoiada por opçons independentistas de diversos territórios sob administraçom espanhola e opçons de esquerda anticapitalista espanhola. A “participaçom” das FSE nesta campanha eleitoral vulnera o exercício de direitos e liberdades fundamentais reconhecidos no actual ordenamento constitucional espanhol e procura, seguindo provavelmente directrizes governamentais, dificultar o trabalho de dezenas de voluntári@s que com escassos recursos económicos e materiais tratam de sacar à rua a única candidatura com presença independentista galega que fai umha denúncia frontal da Europa dos Estados e da repressom. CONTRA A REPRESSOM, LIBERDADE DE EXPRESSOM!