24 pessoas com processos penais abertos que se podem substanciar finalmente em ingressos em prisom e a abertura de 32 expedientes administrativos que somam sançons económicas por valor de 27.000€. Este é o balanço repressivo inicial do que está a custar a mobilizaçom social em defesa do galego nos últimos meses. A implicaçom nesta estratégia de PP e PSOE, ‘Galicia Bilingüe’ e determinados meios comerciais de difusom presentes na Galiza é indicativa da dimensom dumha política que, através da repressom, pretende condicionar a luita do movimento normalizador de base. Militantes e voluntári@s de Ceivar denunciaremos esta realidade ante os milhares de pessoas que se mobilizarám neste 17 de Maio. O ponto de mira habitual das denúncias contra a repressom vem-se situando comummente na extrema direita –nomeadamente, PP e Galicia Bilingüe, que já participa activamente em processos de identificaçom policial e acusaçom-. Contodo, certo fascismo sociológico presente nos principais núcleos urbanos da Galiza nom age em solitário: a participaçom do PSOE na dinámica aberta nestes meses é incontestável e delata como, apesar de este partido nom aparecer como principal ariete dos sectores galegóbos, sim cumpre papeis essenciais na repressom através das ‘Subdelegación del Gobierno de España’, as detençons policiais e a imposiçom de dezenas de expedientes administrativos a activistas pola língua. Assim, um total de 32 processos sancionadores estám abertos neste momento contra activistas pola língua a iniciativa da ‘Delegación del Gobierno de España’. De materializar-se finalmente suporiam a imposiçom de multas por valor de 27.000@ -4.5 milhons de pesetas-a cidadáns galegos e galegas em diversas comarcas do País. A ‘Subdelegación del Gobierno de España’ em Ponte Vedra situa-se como primeira neste ranking da repressom económica, sendo o seu responsável político, o “socialista” Delfín Fernández, particularmente afeccionado a empregar o espólio económico como estratégia de erosom dos movimentos populares. Denúncia da repressom e dos repressores neste 17 de Maio Além da sua condiçom de associaçom que fai agitaçom em favor da plena espanholizaçom do País, GB conta no seu ‘deve’ com a responsabilidade de estar a apresentar-se como acusaçom em processos penais que poderiam supor o ingresso em prisom de dezenas de cidadáns e cidadás galegas. Esta responsabilidade política que assume livremente umha associaçom que se apresenta como “defensora dos direitos civis” (sic) está-se a fazer visível em vários sumários e processos abertos onde concorre como acusaçom particular, identifica activistas pró galego ante a Polícia e a Justiça espanholas e participa activamente na repressom. Neste 17 de Maio, portanto, Ceivar denunciará publicamente o custo repressivo que está a ter a defesa do galego a pé de rua, mas, principalmente, as responsabilidades políticas de PP, PSOE e GB nesta política e a necessidade de que por parte das plataformas e associaçons implicadas na luita em defesa do galego se assuma abertamente, também, um compromisso explícito com quem estám a ser objecto da repressom nestes momentos. Neste sentido, queremos parabenizar o compromisso explicitado por parte d@s assinantes do ‘Aqui e agora, monolingüísmo social. Manifesto à sociedade galega’ no sentido de que “Pomos a nossa voz da banda de todas as represaliadas e todos os represaliados que venhem a ser punidos e perseguidos por diversas acçons em defesa da língua galega, polo que exigimos a paralisaçom imediata dos diferentes processos judiciais abertos contra estes cidadáns e cidadás”. NA GALIZA, SÓ EM GALEGO! SOLIDARIEDADE ACTIVA FRENTE À REPRESSOM!