A recentemente constituida assembleia comarcal de Ceivar de Trasancos organizava nos passados dias 24 e 25 de Abril as ‘I Jornadas em Solidariedade com os Presos Independentistas Galegos’. As jornadas decorrérom sob a legenda ‘Análise da situaçom repressiva na Galiza’ com o intuito de abordarmos tanto a criminalizaçom da dissidência política de umha óptica jurídica quanto o contexto repressivo que actualmente afecta o independentismo galego. A primeira das palestras titulada ‘Terrorismo sem armas. A propósito da criminalizaçom dos movimentos sociais’ tivo lugar no Ateneu ferrolano a cárrego de Borja C. Ferreiro, advogado e activista de Ceivar. A palestra versou sobre o actual conceito de “terrorismo”, a sua aplicaçom extensiva a todo tipo de dissidência organizada -incluida a que se exprime na legalidade- e as políticas de contençom e repressom que se estám a aplicar para dificultar e impedir o avanço social do movimento independentista galego Contexto repressivo actual A segunda tivo lugar no Centro Social da Fundaçom Artábria sob o título ‘Situaçom repressiva do independentismo galego’ e foi ministrada polo advogado do organismo Alexandre Cortiças. Umhas 30 pessoas assistírom a esta palestra na que Cortiças expujo polo miúdo a actual situaçom dos processos abertos contra Sánti Vigo e Jose M. Sanches, assim como a situaçom judicial d@s dez detid@s nos incidentes de 8 de Fevereiro durante a manifestaçom galegófoba de ‘Galicia Bilingüe’. Na segunda parte, a palestra decorreu de maneira informal convertendo-se num colóquio entre ponente e assistentes sobre o actual contexto repressivo, o que estimulou a participaçom d@s presentes.