Alerta antifascista e mobilizaçom social na cidade de Lugo onde se anuncia a iminente celebraçom dum acto neonazi

Quando ainda estám recentes as duas agressons consecutivas recebidas polo centro social Aturujo de Boiro na semana passada, o fascismo ‘callejero’ desponta novamente no nosso País. Agora, na cidade de Lugo. Elementos neonazis preparam para 2 de Maio um acto público na cidade das muralhas. Como reacçom, o centro social Mádia Leva! chama a mobilizar-se “contra a ameaça fascista” e convoca a I Jornada Antifascista à que chama a participar a “lugueses e nom lugueses”. De Ceivar aderimo-nos e fazemo-nos eco desta convocatória convidando à sua máxima difusom. Compartilhamos com o centro social luguês a preocupaçom frente o mínimo despontar dum fenómeno que deve ser tratado com ‘Toleráncia Zero’ por tod@s aquel@s que nos consideramos democratas e antifascistas, porque o rechaço frontal e a mobilizaçom social som as únicas ferramentas para evitar que prenda esta má erva nas áreas urbanas do País, como já aconteceu em outras áreas urbanas sob jurisdiçom espanhola. Temos a certeza de que, para além da retórica racial supremacista, este tipo de movimentos estám dirigidos estratégica e principalmente contra os sectores sociais galegos que trabalhamos em chave nacionalista e independentista. Aliás, queremos denunciar a complementariedade informal existente entre certas políticas de repressom aplicadas desde as ‘Subdelegación del Gobierno de España’ na Galiza e o esporádico accionar destes grupelhos que alargam os tentáculos da repressom até onde ela nom pode chegar legalmente. Assim, difundimos esta convocatória chamando à participaçom na mesma porque, como afirma Mádia Leva!, os elementos da extrema direita “nom tenhem cabimento dentro da realidade multicultural e social” das nossas cidades. I Jornada Antifascista O centro social luguês prepara para a próximo 2 de Maio a I Jornada Antifascista que constará de diversas actividades, entre elas umha concentraçom antifascista “contra o exibicionismo nazi”. Pode-se aceder ao cartaz das jornadas através da ligaçom que aparece ao pé desta informaçom. Publicamos, finalmente, o comunicado emitido por Mádia Leva! com motivo dos actos de 2 de Maio. COMUNICADO DE MÁDIA LEVA! Contra a ameaza fascista de celebración dun concerto, nós respostámoslle do mellor xeito que sabemos facer: Organizándonos. É por iso que esta é unha ocasión na que debemos estar atentos e previdos, un momento idóneo para retomar a andaina antifascista na nosa cidade. A nosa cidade, na que vivimos, na que nacimos e na que uns cantos de nós morreremos. É por iso que non debemos permitir que esta sexa escenario de eventos como o suposto Concerto Rac In Lugo que se pretende celebrar ás aforas da nosa cidade. Un acto que podería traer a Lugo, elementos indesexados que non teñen cabida dentro da realidade multicultural e social á que aspira esta cidade. Así que sexa quen sexa quen esté detrás dese evento, debe saber que prendeu a faísca do movemento de resposta social en Lugo. Dito isto quedades todos emprazados para a I Xornada Antifascista que se celebrará no C.S Madia Leva, na Rúa Amor Meilán a partires das 17:30 e que culminará cunha concentración ás 20:30 na Praza do Campo onde se denunciará a impunidade da que gozan os elementos fascistas e servirá de resposta á posible execución do concerto anteriormente citado. Debemos ser parte deste presente de luita para un futuro consecuente, agora é o tempo da unidade. Por iso lugueses e non lugueses ficades convidados sen excepción a esta xornada. Non pasarán! Nazis, nin nas rúas, nin na música nin en ningures!