A transferência do militante galego desde o cárcere de Mansilla de las Mulas (Leom) para o de Valdemoro (Madrid) no passado dia 3 de Abril, além de demonstrar umha intencionalidade política clara de alonjamento dentro do esquema permanente da dispersom, está-se a saldar com o agravamento generalizado da situaçom carcerária de Santiago Vigo. As últimas informaçons recebidas do preso indicam que a direcçom do conhecido como “centro de extermínio de Valdemoro” decidiu-se a aplicar todo tipo de excepcionalidades com o objectivo de dobrar física, psíquica e politicamente o preso independentista galego. A recente ‘cunda’ de Sánti Vigo para Valdemoro fazia-se quase um mês depois de se iniciar a luita em defesa do direito a umha cela individual que este preso começara em Mansilla de las Mulas junto a José Manuel Sanches. Embora num princípio se valorizou a transferência como um alonjamento que, no entanto, poderia estabilizar a situaçom repressiva do preso galego, os factos indicam que ‘Instituciones Penitenciarias’, através da direcçom de Valdemoro, aposta neste momento por apertar as porcas ao independentista galego e está a aplicar toda umha série de medidas repressivas focadas a alcançar esse objectivo. Assim, para além da permanência em isolamento absoluto 24 horas ao dia, com apenas 4 horas de pátio nas que nom se pode comunicar com nengumha outra pessoa, o centro penitenciário espanhol restringiu ao mínimo todas as pertenças individuais do preso –livros, roupa com que mudar-se, canetas, etc.- no que só pode ser interpretado como um incremento qualitativo da pressom por parte da prisom. Aliás, dentro deste esquema de pressom crescente, os objectos para uso particular que lhe som enviados desde o exterior entregam-se-lhe em estado de deterioraçom ou, simplesmente, som retidos com qualquer escusa ridícula. Possível prolongaçom da situaçom actual A nova situaçom a que se enfrenta em solitário o militante galego poderia prolongar-se por um tempo ainda largo. Dado que Sánti Vigo ainda nom cumpriu 20 anos de idade e ‘Instituciones Penitenciarias’ considera arbitrariamente “menores” os presos e presas até a idade de 21, a aplicaçom do isolamento absoluto poderia prorrogar-se ainda durante um tempo ainda extenso. Facilita esta possibilidade o facto de que, ao se fazer a instituiçom carcerária responsável civil pola situaçom d@s “menores” que se encontram em prisons sem Módulo de Menores, a direcçom de Valdemoro pode argumentar que o isolamento é umha medida de “protecçom da integridade” do patriota galego. Seja como for, a realidade é que tanto no trato repressivo diário com os carcereiros, que se agudiza com a consideraçom implícita de “preso perigoso” ou “conflitivo” de Sánti Vigo ao ter sido classificado em 1º grau, quanto no acesso aos mínimos direitos e serviços que permite o sistema carcerário, se demonstra por parte da prisom espanhola umha determinaçom repressiva clara contra este militante galego que, apesar da sua juventude, demonstrou umha firmeza e umha dignidade que entram em colisom directa contra as estratégias de “reinserçom social” que se aplicam nos cárceres do Estado. Solidariedade activa Sem dispormos de dados significativos sobre a recepçom do correio, de Ceivar chamamos o contorno social e político do preso independentista galego a um envio maciço de correspondência postal –cartas, telegramas, etc.- solidarizando-se com Sánti Vigo. Aliás, a realidade repressiva de que é objecto neste momento será denunciada em sete localidades galegas durante a celebraçom do ‘Dia Internacional dos Presos e Presas Políticas’ a celebrar neste próximo 17 de Abril. Anexamos a continuaçom os actuais destinos penitenciários dos independentistas galegos actualmente presos. Informar, por último, que José Manuel Sanches, que se chantara junto a Sánti Vigo em Mansilla de las Mulas para exigir o seu direito a umha cela individual, continua também submetido a regime de isolamento desde o passado 10 de Fevereiro. Nom existem novidades a respeito da evoluiçom da sua situaçom carcerária. SANTIAGO VIGO DOMÍNGUEZ Centro Penitenciário de Madrid III Ctra. Pinto-San Martín de la Vega, km. 5 28340 Valdemoro (Madrid) ESPAÑA JOSÉ MANUEL SÁNCHEZ GORGAS Centro Penitenciario de Mansilla de las Mulas Paraje Villahierro 24210 Mansilla de las Mulas (León) ESPAÑA