Por volta de 25 pessoas assistírom onte à assembleia informativa convocada desde Ceivar no marco das iniciativas locais de contestaçom ao processo político que se celebrará em Madrid em 3 e 4 de Novembro contra as militantes independentistas Giana Gomes e Ugio Caamanho. Após informar-se do estado da questom, propujo-se um plano de trabalho que se desenvolverá durante as próximas semanas na comarca viguesa e visa utilizar todo tipo de suportes comunicativos para denunciar o juízo no tribunal de excepçom espanhol. A de Vigo é a primeira assembleia informativa convocada, embora se celebrarám outras nas principais cidades galegas e nas comarcas de Barbança, Taveirós, Límia, etc., algumhas ainda pendentes de concretar dia, hora e lugar. Aliás, por parte da Mesa Nacional do organismo popular anti-repressivo encarregou-se diverso material informativo que sairá às ruas do País nos próximos dias para garantir que o processo no tribunal político especial seja conhecido em todo o território nacional. “Motivos ilegais” Em outra ordem de cousas, roçando a comicidade, ou mais bem mostrando mais umha vez o cinismo que enchoupa o sistema penitenciário, o preso independentista galego Ugio Caamanho, dispersado a Puerto de Santa María I polo Executivo de Madrid, era informado por carcereiros de que o roubo de 50 manualidades ocorrido na semana passada deveu-se à “necessidade de comprovar se estas continham motivos ilegais” (sic). Referimo-nos aos crachás confeccionados polo preso galego para a venda no exterior que fôrom substrazidos por funcionários da prisom espanhola.