‘Audiencia Nacional’ julga o histórico dirigente dos GRAPO José Antonio Ramón Teijelo

As salas da ‘Audiencia Nacional’ acolhem nesta quinta-feira um processo judicial contra o militante comunista José Antonio Ramón Teijelo, ao que diversos meios de difusom situam na cúspide da organizaçom armada ‘Grupos de Resistencia Antifascista Primero de Octubre’ (GRAPO) desde 1995 a 1998. Teijelo será processado segundo estas fontes por um presunto delito de “estragos terroristas em grau de tentativa” polo que o tribunal especial solicita para ele dez anos de privaçom de liberdade. Nascido em Ponferrada (Berço) em 5 de Abril de 1947, o processado aparece vinculado à direcçom da organizaçom armada espanhola de 1995 e 1998, quando teria sido substituido polo também galego Fernando Silva Sande (Carnota, 1954), actualmente encarcerado. Detido ao norte de Paris em Outubro de 2005 junto a outra militante, dentro dum operativo policial internacional em que participava a ‘Guardia Civil’, a Renseignements Generaux e a DNAT francesas e a Polícia italiana, Teijelo foi entregado em Setembro de 2007 às autoridades espanholas por parte do Estado francês. A fiscal do tribunal político especial Susana Landeras solicita dez anos de cárcere para o histórico militante revolucionário por um presunto delito de “estragos terroristas em grau de tentativa”, umha vez que Ramón Teijelo teria participado, presuntamente, no operativo que rematava com a colocaçom dum artefacto explosivo nos escritórios da emissora ultradireitista ‘Cadena Cope’. Esta acçom descorreu em Barcelona em 5 de Agosto de 1998 e o artefacto nom chegou estourar.