Dentro da série de iniciativas desenvolvidas nestes dous dias em diversos pontos do País para denunciar as malheiras recebidas polo patriota galego Sánti Vigo em Aranjuez, destacamos a performance organizada por voluntários e voluntárias do organismo popular anti-repressivo na tarde de onte na capital galega. O acto consistiu numha representaçom colectiva ante numeroso público dos sucessos ocorridos em Aranjuez, enquanto outras pessoas informavam os peons através de altofalantes das torturas aplicadas ao preso independentista galego. Por volta das 21:00 abria-se na Praça Vermelha umha faixa com a legenda ‘Preso independentista galego foi torturado em Madrid. PsoE Fascista’ da que termavam cinco voluntári@s com carautas e as bocas tapadas por bandeiras espanholas. Nesse preciso momento inicia-se o encenamento dumha malheira com toletes por parte de quatro carcereiros contra um preso algemado e encarapuçado. A agressom produz-se entre insultos e vejaçons, gritos de ‘Arriba España!’ e adverências de que ‘Te vamos a hacer um buen español’. Enquanto, umha voluntária de Ceivar narra ao público presente os sucessos ocorridos no sábado no centro penitenciário de Aranjuez e denuncia o emprego da tortura por parte do Estado. Finalmente, os agressores colhem o preso anunciando que o levam para o módulo de isolamento. Ao remate da obra explica-se que o ali representado é fiçom mas que, contodo, essa ‘fiçom’ está a acontecer realmente nos cárceres espanhóis com os prisioneiros políticos. Aliás, denuncia-se a persistência da tortura e a imposiçom da prisom preventiva e a dispersom. Simultaneamente, um grupo dumhas vinte pessoas grita ‘Nom som funcionários, que som repressores’, ‘Estado espanhol, tortura e assassina’, e ‘Presos à rua, a luita continua’. Arredor das 21:30 h. remata-se o acto. Também na Zona Velha A performance tivo grande expectaçom na gente que estava nas terraças e transitava pola praça a essa hora, produzindo-se mesmo umha ralentizaçom do tránsito de carros que se detinham a ajejar. Sobre as 22:00 h. a performance repete-se na praça do Pam na zona velha nos termos do representado umha hora antes. Vizinhos e turistas surpreendem-se e param a olhar. Mentres os carcereiros levam o prisioneiro, este berra ‘Viva Galiza ceive!’ e ‘Antes mortos que escravos’. Remata o acto com palavras-de-ordem contra o regime espanhol e a exigência de “repatriaçom imediata e liberdade innegociável para tod@s @s pres@s independentistas”. Às 22:30 finaliza o acto. Oferecemos no portal Indymedia Galiza umha reportagem fotográfica que se pode olhar clicando a ligaçom colocada ao pé desta notícia.