Gloria Lago apela à Polícia espanhola e a ‘Guardia Civil’ para perseguir os protestos contra a associaçom ultra ‘Galicia Bilingüe’

Rosto público nº 1 de ‘Galicia Bilingüe’, associaçom espanholista que luita “contra a imposiçom do galego”, a professora Gloria Lago destapa hoje em ‘Faro de Vigo’ os verdadeiros interesses e objectivos que defende o seu colectivo. Segundo a presidenta de ‘Galicia Bilingüe’, a Polícia espanhola e a ‘Guardia Civil’ devem empregar-se a fundo na repressom d@s opositor@s ao ‘bilingüísmo harmónico’. “Estám investigando muito –assegura Lago, que parece manejar fontes policiais de primeira mao- porque som movimentos radicais que estám colhendo força e há que parar”. A sintonia das declaraçons de Gloria Lago com a informaçom facilitada a ‘Faro de Vigo’ polo ‘Ministerio de Interior’ no passado dia 10 resulta esclarecedora das intençons de ambos. Assi, o departamento que preside Pérez Rubalcaba assegurava nesse dia ter “provas mais do que suficientes de que a estrutura dos movimentos independentistas se reforçou, com a correspondente preocupaçom de todas as administraçons” e anunciava, com este motivo, que Madrid destinaria trinta “expertos antiterroristas”, é dizer, ‘Interior’ combate umha dissidência política interna com métodos militares e policiais. FSE para combater os opositores à fraude do ‘bilingüísmo harmónico’ Gloria Lago, que é neste momento a voz do buque insígnia dum espanholismo combativo e ‘callejero’ que se enfunda o disfraze da “defesa dos direitos civis” (sic), assegura a ‘Faro de Vigo’ que “pede a igualdade de direitos para os falantes das duas línguas oficiais” e reivindica “mais liberdade”, umha vez que, segundo as suas declaraçons, a presença do espanhol “em muitos centros educativos é já umha anedota” (sic). A presidenta de ‘Galicia Bilingüe’, além de dedicar-se a difundir umha versom invertida do mundo real e vitimizar os hispanofalantes, aposta decididamente na via policial contra “os movimentos radicais”. De facto, os protestos sociais contra o citado colectivo espanholista já se saldárom até o momento com várias pessoas contusionadas por efectivos da Polícia espanhola, detençons, juízos e umha grave repressom económica desenvolvida desde as ‘Subdelegaciones del Gobierno de España’ que se aproxima neste momento –segundo os dados que maneja Ceivar- dos 24.000€, isto é, quase 4 milhons das antigas pesetas. A conivência de ‘Galicia Bilingüe’ com os Ameijeiras Vales, os Delfín Fernández, os Mesura Pose, as FSE e os principais meios de difusom que se oferecem de altofalantes da sua mensagem falam às claras de que tipo de “direitos civis” defendem as hostes que se mobilizam trás as palavras-de-ordem de Gloria Lago. NA GALIZA, SÓ EM GALEGO! STOP À REPRESSOM CONTRA O MOVIMENTO SOCIAL POLA LÍNGUA! FASCISTAS FORA DA GALIZA!