Nesta semana passada, os julgados de Ponte Vedra notificavam aos militantes Alexandre Rios, Antia Marinho e Anjo Torres o auto judicial que condena os dous primeiros por um ‘delito’ de “injúrias ao Exército espanhol” e absolve o terceiro de qualquer responsabilidade penal. @s três independentistas foram imputados, além de nas citadas “injúrias”, num outro delito de suposto “mal-trato a membros das Forças Armadas”. Os factos a que remite o juízo celebrado no 4 de Fevereiro datam de Junho de 2006, quando vários independentistas denunciavam a tentativa da Brilat de recrutar soldados no centro de ensino Valle-Inclán de Ponte Vedra. A nova sentença enquadra-se na repressom sistemática da liberdade de expressom que desenvolve o ‘Subdelegado del Gobierno de España’ em Ponte Vedra, o a cada mais tristemente famoso Delfín Fernández (PSOE). Assi, após o tribunal ser incapaz de demonstrar a suposta agressom a militares espanhóis, que implicava condena a um ano de cárcere, aplica agora umha forte repressom económica a dous dos imputad@s obrigando a que paguem 2190€ cada um por um suposto delito de ‘injúrias’, isto é, mais de 700.000 das antigas ptas. por exprimir publicamente a consideraçom política que aos imputados merece o Exército do país vizinho. O sítio web da organizaçom juvenil à que pertencem @s imputad@s fai um chamado “à solidariedade activa com @s retaliad@s e à denúncia em todos os foros possíveis deste golpe contra a liberdade mais básica e inegociável”. De Ceivar, além de responder a este convite, queremos vincar num facto que vimos denunciando nos últimos meses, que é a estratégia do PSOE na ‘provincia’ de Ponte Vedra para fazer impraticável ou altamente custoso o exercício de direitos e liberdades democráticas básicas como o direito de manifestaçom, de reuniom e a liberdade de expressom, assi como a tentativa de afogar por via administrativa e judicial os diferentes movimentos sociais e políticos de contestaçom.