Quarenta e quatro dias após do prazo fixado polo próprio ‘Tribunal Supremo’ espanhol, a alta instáncia judicial decidia neste sábado passado desconsiderar o recurso apresentado polo militante comunista e activista galego do organismo anti-repressivo SRI Carlos Cela para lograr a sua excarceraçom. A decisom do ‘Tribunal Supremo’ implica que activista do SRI continuará preso e dispersado ilegalmente, embora à espera dum novo juízo que revise a sua situaçom. Dá-se a circunstáncia de que o cidadám basco Juan Manuel Olarieta, detido sob circunstáncias similares durante o operativo que supujo também o ingresso em prisom de Carlos Cela, se encontra em liberdade, enquanto o militante galego continua preso do cárcere de Valdemoro. Fontes da família de Carlos Cela assegurárom que o preso político galego apresentará um novo recurso exigindo a sua excarceraçom, umha vez que o auto judicial nom foi redigido por um juíz titular do citado tribunal. Recordamos que Carlos Cela se encontra preso desde 23 de Janeiro de 2008 como resultado dum operativo “contra o GRAPO” organizado polo instituto armado espanhol. O dispositivo policial desdobrado naquela altura encenava umha situaçom paradoxal porquanto, enquanto o próprio ‘Ministro de Interior’ espanhol assegurava que a organizaçom armada estava desmantelada, continuava detendo militantes políticos de forma “preventiva”. Carlos Cela Seoana foi preso e dispersado à prisom espanhola de Valdemoro, a mais de 600 quilómetros do seu País, onde se encontra neste preciso momento. O destino penitenciário a que se pode escrever a este preso político galego é: CARLOS CELA SEOANE Centro Penitenciario de Madrid III Carretera Pinto-San Martín de la Vega, km. 5 28340-Valdemoro (Madrid) ESPAÑA Pode-se consultar informaçom completa sobre a solidariedade com o militante do SRI no linque que anexamos sob estas linhas.