De Delfín Fernández diz-se na ‘provincia’ de Ponte Vedra que a contundência repressiva que emprega, que é a aplicaçom exaustiva e generalizada das políticas repressivas do PSOE para os conflitos e movimentos sociais e sócio-laborais sem controlo institucional, teria como objectivo reforçar o seu perfil ante Madrid para alcançar postos de mais significaçom no aparelho do Estado. Seja como for, a prática do ‘Subdelegado del Gobierno de España’ em Ponte Vedra e tardio corredor na administraçom estatal anuncia que Fernández fará ‘boas’ personagens tam sinistras como Juan Miguel Diz Guedes ou Arsenio Fernández de Mesa. A última incidência violenta de que é responsável político o ex concelheiro ‘socialista’ (1999-2003) na câmara municipal de Vigo saldou-se segundo diversos meios com três pessoas feridas. A intervençom policial tivo como objecto evitar que a titular espanhola de Pesca, Elena Espinosa, tivesse conhecimento dum protesto organizado conjuntamente por 50 armadores e pescadores do porto de Vigo para denunciar a situaçom que atravessa o sector pesqueiro. Duas pessoas rematárom ingressadas no hospital, enquanto umha terceira foi golpeada brutalmente na cabeça e eram cacheados policialmente todos os participantes na concentraçom. Por sua parte, trás evitar o protesto graças ao dispositivo organizado por Delfín Fernández, Espinosa assegurava cinicamente que “sempre defendim a liberdade de expressom, mas dentro da responsabilidade”.