A editorial galega Xerais vem de editar sob o título ‘A represión lingüística en Galiza no século XX (Aproximación cualitativa á situación sociolingüística de Galiza)’ umha extensa investigaçom sobre a perseguiçom, desvalorizaçom e processo de substituiçom social a que foi submetida a nossa língua no passado século e que hoje continua. O trabalho da autoria de Maria Pilar Freitas Juvino (Campo Lameiro, 1960) é resultado da tese de doutoramento apresentado na Universidade de Vigo por esta licenciada em Filologia Románica e doutora em Filologia Galega. A investigaçom de Freitas Juvino sai à luz num momento em que sectores sociais minoritários ligados à extrema direita, mas arroupados por importantes consórcios mediáticos e com cobertura institucional, tratam de derrogar os mínimos avanços legislativos alcançados polo galego nos últimos anos e, particularmente, impor umha visom distorcionada e invertida da realidade, segundo a qual a língua nacional da Galiza é que “persegue” o espanhol e a comunidade galego-falante quem vulnera os direitos sociolíngüísticos dos espanhol-falantes. O livro de 864 páginas analisa as sucessivas iniciativas legislativas espanholas destinadas a minorizar a nossa língua; estuda o processo de desvalorizaçom social desta e a introduçom de comportamentos de auto-ódio na cidadania galega; a desmantelaçom das instituiçons culturais galegas e a perseguiçom d@s galeguistas em 1936 e na pós-guerra, etc. A autora centra o seu interesse investigador na defesa da diversidade lingüística e os processos de substituiçom como os que afectam à língua do País.