Plataforma pola liberdade dos ‘Três do Eixo’ convoca nova mobilizaçom para exigir o indulto ao Executivo de Madrid

Umha nova mobilizaçom popular para exigir ao Executivo espanhol a liberdade dos conhecidos como ‘Os Três do Eixo’ através dum indulto governamental decorrerá na capital galega neste 9 de Maio. Trata-se dumha concentraçom a celebrar na Praça do Obradoiro a partir das 20:30 h. do serám. Recordamos que Simón Vázquez, José Moreira e Jesús Montoiro encontram-se privados de liberdade no macrocárcere de alta segurança de Teixeiro desde 30 de Outubro de 2007. Todas as iniciativas desenvolvidas até hoje para lograr a excarceraçom dos três vizinhos aparentam nom ter conseguido o seu objectivo. Lembramos que os popularmente identificados como ‘Três do Eixo’ som três vizinhos da paróquia compostela do Eixo que, em Julho de 1998, há agora quase dez anos, fôrom acusados de “atentar” contra O antidistúrbios da Polícia espanhola Luis Gómez quando este, junto a outros efectivos deste corpo repressivo, carregavam selvagemmente contra homes, mulheres e meninos que exigiam segurança viária na paróquia após umha sequência de mortes e acidentes na estrada e um ronsel de incumprimentos institucionais. Dupla vara de medir do PSOE O largo processo judicial enfrontado polos três vizinhos e, a um tempo, por todo O Eixo, que é retaliado nestas pessoas, estivo inçado de irregularidades jurídicas que derivárom, finalmente, numha condena a prisom que evidência umha justiça de vingança, desinteressada dos factos e que age de forma exemplarizante como mecanismo de repressom e contençom social. Neste momento, após dezenas de mobilizaçons e iniciativas, a bola continua no telhado do Governo espanhol que se demonstra reácio à concessom do indulto, mas, simultaneamente, é capaz de liberar de responsabilidades e reintegrar ao serviço os quatro polícias locais condenados a cárcere por torturar o cidadám senegalês Mamadou Kane em 17 de Março de 1997 na cidade de Vigo. Anexamos a continuaçom a ligaçom ao sítio web onde se pode encontrar um seguimento exaustivo deste processo repressivo e publicamos os lugares de internamento forçoso em que se encontram os três vizinhos encarcerados por defender a segurança viária na sua paróquia. Simón, José e Jesús, LIBERDADE! STOP À REPRESSOM DAS LUITAS SOCIAIS! Simón Vázquez Valle (Pavilhom nº 8) José Moreira Fernández (Enfermagem) Jesús Montoiro Cepeda (Enfermagem) CENTRO PENITENCIARIO DE TEIXEIRO Estrada de Paradela, S/N 15310-Teixeiro CÚRTIS