As consequências repressivas dos protestos contra a presença de ‘Galicia Bilingüe’ em diversas comarcas do País continuam chegando às casas. Se recentemente informavamos das agressons policiais produzidas na Crunha e Vigo e as sançons de milhares de euros impostas a defensores da língua nesta última cidade, o largo braço da Polícia espanhola, a ‘Delegación del Gobierno de España’ na Galiza e a Justiça chegava nesta semana à comarca de Trasancos. Mais um militante independentista sentará-se ante o juíz por “desobediência à autoridade” no próximo dia 24. Além dos lugares comuns que informam o presente processo e som pam de todos os dias na actividade política da militáncia independentista neste País, nesta ocasiom dá-se a circunstáncia novidosa de que a entidade afectada polo protesto, ‘Galicia Bilingüe’, inibiu-se de apresentar qualquer denúncia e é a própria Polícia espanhola quem assume de forma militante esta responsabilidade ante os e as defensores da língua galega que em 29 de Fevereiro denunciárom a presença do autocarro deslocado a Narom pola organizaçom espanhola. Briga convocou umha concentraçom de denúncia deste enésimo processo ante os julgados de Ferrol para as 11:00 h. da próxima quinta-feira 24 de Abril. De Ceivar alentamos todas aquelas pessoas da comarca trasanquesa que podam deslocar-se a esta concentraçom a mobilizar-se activamente, de modo que apliquemos a norma nom escrita de que todos e cada um destes juízos políticos que procuram erodir a militáncia galega tenham à sua frente umha resposta política pública que sirva para evitar a rotinizaçom e normalizaçom deste tipo de processos e sua a conversom num incómodo trámite administrativo aceite com normalidade. 24 DE ABRIL, TOD@S AOS JULGADOS DE FERROL! CONTRA TODA REPRESSOM, MOBILIZAÇOM!