Carlos Cela Seoane foi detido no passado 23 de Janeiro no seu domicílio da Crunha por efectivos da ‘Guardia Civil’ dentro dum operativo que o instituto armado espanhol e os meios de difusom assegurárom que se desenvolvia “contra o Grapo”. Actualmente, o companheiro encontra-se privado de liberdade e ilegalmente dispersado na prisom espanhola de Valdemoro (Madrid) a 600 quilómetros do seu domicílio habitual. Do nosso organismo, dentro das iniciativas que desdobra a assembleia que exige a sua liberdade, apelamos às leitoras e leitores de ceivar.org a assinar a demanda de liberdade para Carlos Cela publicada no web ‘Carlos livre agora!’. Militante galego do organismo anti-repressivo internacional SRI, antifascista e comunista, Carlos Cela é umha pessoa que se por algo se destaca na sua trajectória individual é polo seu compromisso nom seitário com os presos e presas políticas no Estado espanhol e contra a repressom. A sua detençom, encarceramento, dispersom e inclusom num processo judicial na ‘Audiencia Nacional’, apenas é compreensível da óptica dum Estado que decidiu redefinir o “terrorismo”, que no sucessivo já nom será apenas a oposiçom política ilegal ao regime, mas qualquer trabalho de dissidência político-social que denuncie o stablishment e as actuais relaçons de poder. Esta redefiniçom politicamente interessada complementa-se com umha nova estratégia de tratamento a nível jurídico. Redefiniçom do “terrorismo” e tratamento penal consequente Um amplo leque de termos e práticas, como som o ‘Direito Penal do Inimigo’, que suspende da condiçom formal de cidadáns e cidadás @s dissidentes polític@s, reduzindo-os à subcategoria de ‘inimigos’ e tratando-os penalmente como tais; a vigência nos tribunais da ‘Teoria del Desdoblamiento’, e a sua expressom mediática como ‘Doctrina Garzón’, que estende a responsabilidade penal do “terrorismo” até virar em papel molhado a liberdade de associaçom e reinstaurar o delito de opiniom; a redefiniçom europeia do conceito, que hoje alcança àqueles que pretendam por vias políticas “alterar gravemente ou destruir as estruturas políticas, económicas, ambientais ou sociais dum país”, etc., dam cobertura a este reajustamento na estratégia repressiva estatal do que estám a ser destinatários dezenas de militantes polític@s legais em todo o Estado espanhol. Ante este quadro de situaçom, consideramos urgente desenvolver todas as iniciativas de denúncia e combate social desta INVOLUÇOM que se produz no ámbito jurídico e cujos efeitos políticos e repressivos a curto, meio e largo resultam evidentes. Só práticas de denúncia, combate e mobilizaçom social podem enfrentar com um mínimo de garantias o processo antidemocrático em que estamos imersos e do que som cúmplices activos ou silentes todos os partidos com presença no ámbito institucional da CAG. Anexamos ao pé desta informaçom o endereço web onde se pode assinar em defesa da liberdade de Carlos Cela Seoane.