‘Guardia Civil’ identifica dezenas de trabalhadoras que denunciam as ameaças de morte do patrom a umha operária de Tallemprés, S. L.

Dezenas de trabalhador@s concentravam-se onte ante as portas de Tallemprés, S. L. em Arteijo para denunciar o patrom desta empresa, que ha duas semanas tentou agredir umha operária e ameaçou-na de morte, segundo informa a central nacionalista CIG. Dous veículos da força militar espanhola deslocavam-se até o lugar da concentraçom procedendo a identificar a prática totalidade d@s manifestantes quando est@s abandonavam o lugar. Segundo a CIG, “o protesto desenvolveu-se sem incidentes, nem alteraçons da ordem”. @s participantes na concentraçom de denúncia deste novo caso de acossa laboral encontrárom-se com os portons da empresa encerrados durante o tempo do protesto, embora havia actividade laboral no interior. Os agentes da ‘Guardia Civil’ obviárom os requerimentos dum sindicalista para que instassem o empresário a abrir o portom e assi poder entregar o parte de baixa da trabalhadora. Por contra, procedérom a identificar @s trabalhador@s quando começavam disolver a concentraçom. Ameaças de morte “Mato-te e meto-te num contentor antes de pagar-che um peso” foi o explícito anúncio que o proprietário de Tallemprés, S. L., Pedro Vázquez Fernández, fijo à trabalhadora acossada. Segundo informa a CIG, a operária ameaçada polo empresário lograva evitar a agressom abandonando apresuradamente o centro de trabalho no seu veículo particular. Actualmente, encontra-se de baixa por depressom. Desconhece-se, segundo a fonte citada, que o instituto armado espanhol tenha iniciado algum tipo de investigaçom sobre o proprietário desta empresa que se encontra na Parcela 144 do Polígono de Sabom.