A Polícia espanhola demonstrou mais umha vez de que é capaz. Um amplo dispostivo –8 carrinhas e uns 50 agentes armados- rodeavam na noite de onte o Centro Cultural Caixanova para evitar o protesto convocado contra a conferência convocada pola associaçom anti-galega ‘Galicia Bilingüe’. Meia hora antes de iniciar-se o acto espanholista, 40 ou 50 agentes ‘antidistúrbios’ cercavam as 150 pessoas que se concentrárom trás a faixa ‘Na Galiza em galego. ‘Galicia Bilingüe’ espanholistas’ procedendo à sua identificaçom. Aliás, @s concentrad@s eram arrecunchad@s e rodead@s contra a Casa das Artes, a escassos metros donde ‘Galicia Bilingüe’ celebrava o seu acto para que este descorresse com normalidade. Segundo fontes participantes na contestaçom, que citam testemunhas oculares do ocorrido, um agente da Polícia espanhola lançou um petardo de escassa intensidade contra a massa d@s concentrad@s provocando umha reacçom instantánea de dispersom que foi aproveitada polos ‘antidistúrbios’ para realizar umha carga brutal na que resultárom feridas várias pessoas. Como produto desta era detido um jovem da paróquia de Corujo e várias pessoas resultavam contusionadas. O militante do nosso organismo, Óscar G., precisava atençom hospitalária trás ser golpeado na cabeça por dous agentes da Polícia espanhola. Durante a carga, foi detido e espancado brutalmente por vários agentes o moço de Corujo conhecido por Lhusa. O jovem foi conduzido num veículo policial para a esquadra policial de López Mora, onde se encontra neste momento à espera de ser posto a disposiçom judicial hoje à manhá. Dezenas de pessoas concentrárom-se ante as dependências do corpo repressivo para exigir a sua liberdade disolvendo-se tempo depois. Segundo soubo Ceivar a primeira hora desta madrugada, vários dos participantes na concentraçom solidária fôrom identificados por terceira vez quando regressavam para as suas casas. Os polícias que participárom nas identificaçons sacárom novamente as suas armas regulamentares para ‘reduzir’ o protesto dos identificados, que suportavam este trámite por terceira vez em poucas horas. Protesto dentro Segundo informa o web www.primeiralinha.org, várias pessoas lográrom aceder também ao interior do Centro Cultural Caixanova, desdobrando cartazes individuais em que de denunciava que ‘Bilingüísmo é espanholismo’ e ‘Bilingüísmo é imperialismo’. Em todos os casos, estas pessoas fôrom reduzidas e forçadas a retirar-se do salom de actos em que celebrava o acto da organizaçom financiada polo Partido Popular. Concentraçom hoje ante a posta a disposiçom judicial do detido Trás a detençom de Lhusa, que veu acompanhada dumha brutal violência sobre a sua pessoa, o vizinho de Corujo foi conduzido a dependências policiais. Nengumha tentativa de familiares e vizinhos para conhecer dados sobre a sua situaçom e estado tivo sucesso, aguardando-se que seja posto a disposiçom judicial nesta manhá. Umha concentraçom convocada para as 9:30 h. aguardará pola sua posta em liberdade e o conhecimento da situaçom penal em que fica. De Ceivar convidamos a assistir a este novo acto colectivo de denúncia da brutalidade policial e a repressom espanhola.