Som dias de ascendente intensidade repressiva e semelha que umha veda implícita contra o independentismo acaba de levantar-se de todo: todo vale e perseguiçom mediatiza-se e espectaculariza-se. ‘El Correo Gallego’ anunciou nas últimas horas na sua ediçom digital, aludindo a “fontes fidedignas” que nom explicita, que o vizinho de Angrois e militante independentista Eduardo Vigo está a ser procurado por efectivos da Polícia espanhola, que o relacionariam com a apariçom dum suposto ‘zulo’ na paróquia compostelana de Arins. Após umha crónica inçada de imprecisons, ‘El Correo Gallego’ achega como ‘evidências’ que Eduardo Vigo “tem antecedentes por realizar pintagens na rua”, foi candidato numha listagem independentista ao Parlamento Europeu e é irmao de Santiago Vigo, preso independentista galego desde que no passado mês de Dezembro foi detido por efectivos da ‘Guardia Civil’ na vila de Portozinho. Trás relacionar o suposto ‘zulo’ com a “formaçom (sic) Resistência Galega” na que, segundo ‘El Correo Gallego’, “se integram diferentes grupos radicais galegos” (!), o diário ultraespanholista argumenta que os controlos que nos últimos dias afectam os acessos da capital galega com “umha medida preventiva e dissuassória”. Declaraçons do alcalde Sánchez Bugallo som utilizadas para dar mais empaque ao sensacionalismo da ‘informaçom’. “Nom há um motivo concreto para esperar um atentado de ETA, mas tampouco se pode descartar essa hipótese”, assegura o regedor espanhol.