Estudantes da USC auto-organizarám-se para enfrentar a vaga repressiva contra o independentismo e as liberdades civis na Universidade

Segundo se vem de fazer público, estudantes da Universidade de Compostela darám o passo de auto-organizar-se colectivamente para fazer frente à vaga de detençons e criminalizaçom que durante a última semana se desenvolveu contra os sectores mais combativos da instituiçom académica. A decisom supom um salto qualitativo à hora da organizaçom da contestaçom, que até o momento se moveu entre o espontaneismo e as forçadas tentativas de encaixar a solidariedade colectiva em moldes partidistas. Neste sentido é que se vem de convocar umha Assembleia Geral de Estudantes da USC para amanhá quinta-feira 21 de Fevereiro. A cita é para as 14:30 h., fora do horário lectivo para facilitar a assistência, e celebrará-se na Faculdade de Geografia e História. Segundo a convocatória difundida, o “único ponto” a tratar será a articulaçom dumha “resposta à agressom sofrida por vári@s estudantes na passada semana na Faculdade de Económicas da USC e a ilegalidade das suas posteriores detençons”. Fórmulas adequadas para responder colectivamente De Ceivar animamos incisivamente a participar nesta iniciativa da óptica de que umha resposta ampla e contundente à repressom, se bem deve unificar num único punho todo tipo de fracçons e sensibilidades políticas e anti-repressivas e suspender qualquer vocaçom de protagonismo, também deve simultaneamente oferecer fórmulas organizativas válidas e cómodas para que essa amplitude e essa contundência podam materializar-se e produzir-se sem entraves. Desta óptica, apostamos, clara e rotundamente, por ultrapassar qualquer vocaçom protagónica ou de mera ‘especializaçom anti-repressiva’ na resposta a factos como estes de que agora é alvo a militáncia independentista e a própria ‘comunidade universitária’ e parabenizamos aquelas fórmulas que permitam que a contestaçom social à repressom deixe de ser o espaço em que se dirimem hegemonias e protagonismos em favor do que é necessário e urgente: manter a raia o neofascismo de novo cunho que se pretende impor, agora, na Universidade; mais tarde, provavelmente, em todos os ámbitos sociais que o permitam. Pode-se consultar mais informaçom no síto web da Assembleia da USC cujo linque anexamos ao pé desta notícia. Económicas inicia trámites de expulsom Segundo informa o portal GZnación.com, esta convocatória da Assembleia de Estudantes da USC coincide no tempo com o iníco por parte da Junta de Faculdade de Económicas dos trámites de expulsom de estudantes implicados no protesto contra a presença da dirigente fascista María San Gil. Segundo esta fonte, que se remite às declaraçons dum membro do citado órgao, a Faculdade nom tem poder impositivo, mas remitiria a sua posiçom para a máxima autoridade da USC, a Reitoria, que será quem finalmente decida a paralisaçom da medida ou dé via livre à sua imposiçom. Recomendamos a leitura desta informaçom no portal GZnación.com.