Ceivar chama a mobilizar-se no sábado 23 para exigir a liberdade de Carlos Cela

Aderindo à convocatória realizada na Crunha por solidári@s com o militante anti-repressivo Carlos Cela Seoane, recentemente detido e preso “num operativo policial contra o Grapo”, o nosso organismo chama a participar na concentraçom a realizar no próximo sábado 23 de Fevereiro na Praça das Conchinhas para exigir a sua liberdade. O militante galego foi detido no seu dia por agentes da ‘Guardia Civil’ e encontra-se actualmente dispersado no Centro Penitenciário de Valdemoro (Madrid). O acto solidário decorrerá na Agra de Orçám a partir das 18:00. Lembramos que Carlos Cela era detido na Crunha no passado 23 de Janeiro. Incomunicado sob legislaçom ‘antiterrorista’ e deslocado a Madrid, ingressava dous dias depois na prisom de Soto del Real para ser logo transferido para a de Valdemoro onde se encontra actualmente. A situaçom do preso galego depende neste momento dum recurso que se resolverá nos próximos meses a respeito da prolongaçom ou suspensom do regime de prisom preventiva em que se encontra. De Ceivar animamos todas as pessoas e agentes políticos e sociais a dar a máxima difusom a esta iniciativa que se enquadra na pressom social desenvolvida nas últimas semanas para conseguir a liberdade do cidadám galego e companheiro no trabalho anti-repressivo. Anexamos ao pé desta notícia o linque com o blogue onde se reclama a excarceraçom de Carlos Cela Seoane. O destino actual do preso político galego ao que se pode enviar correspondência solidária é: Carlos Cela Seoane CENTRO PENITENCIARIO DE MADRID III Ctra. Pinto-San Martín de la Vega, km. 5 28340 Valdemoro (Madrid) ESPANHA