O ‘plante’ desenvolvido nesta semana polos presos independentistas galegos no cárcere de Alcalá-Meco e a pressom exercida sobre a direcçom do centro penitenciário por parte de advogados de Ceivar parecem ter dado resultados positivos nesta ocasiom: José Manuel Sanches e Santiago Vigo eram transferidos nesta manhá de Meco para a prisom espanhola de Aranjuez. A mudança de destino carcerário aplicada simultaneamente a ambos presos justifica-se formalmente devido à necessidade de o primeiro recluso receber umha atençom médica para a que a prisom de Meco nom dispom de instalaçons. Contodo, o facto de que a medida se adopte após ambos militantes se chantarem frente à direcçom e o seu envio conjunto para Aranjuez delatam que as razons da ‘cunda’ nom som meramente sanitárias. À espera da informaçom que podam facilitar por via telefónica os presos sobre a sua ‘cunda’ (transferência dum cárcere para outro), de Ceivar interpretamos a saída de Meco e a dispersom para outra prisom como umha pequena vitória, e esperamos que esta mudança física se traduza também na suspensom da acossa permanente à que, com a total permissividade da direcçom de Madrid II, se vírom submetidos ambos presos independentistas galegos neste primeiro mês de prisom. Recordamos que, entre outras práticas padecidas durante a estáncia no Módulo de Menores de Madrid II, Sánti Vigo e José Manuel Sanches fôrom objecto de agressons (no caso de Sánti), roubos, acossa física, insultos relativos à sua condiçom nacional, retençom do correio, interrupçom das chamadas telefónicas por parte de carcereiros, proibiçom do acesso ao polidesportivo, alargamentos desnecessários nas autorizaçons das listagens de visitas, etc. Convidamos ao envio maciço de correio Advertimos também de que, conforme à resposta dada nestes dias em diversos pontos do País, de Ceivar continuaremos a denunciar publicamente qualquer vulneraçom de direitos que afecte aos cidadáns e cidadás galegas que neste momento se encontram privados de liberdade por causa da sua militáncia independentista e dum compromisso firme e generoso com a luita pola defesa e a liberaçom nacional e social da Galiza. Publicamos a continuaçom o novo destino penitenciário em que se encontram Sánti Vigo e José Manuel Sanches, convidando os nossos leitores e leitoras ao envio maciço de correspondência, assi como a manter esta de forma sostida com os três presos e a presa independentista galega. JOSÉ MANUEL SANCHES GORGAS SANTIAGO VIGO DOMINGUES Centro Penitenciário de Madrid VI Crtra. Nacional 400, km. 28 28300-Aranjuez (Madrid) Espanha