Animamos a assistir às concentraçons de solidariedade e denúncia convocadas nas próximas horas trás as detençons de onte

Atendo-nos a um princípio elementar de solidariedade nom corporativa, do organismo popular anti-repressivo Ceivar chamamos toda a cidadania galega em Vigo e na Corunha a assistir às concentraçons que nas próximas horas se celebrarám nas duas cidades galegas em regime de autoconvocatória para informar sobre a situaçom em que se encontram Xosé Luís Fernández “O Ché” e Carlos Cela, ambos militantes destacados polo seu trabalho anti-repressivo, e denunciar a perseguiçom de ideias políticas. Animamos, aliás, a dar a máxima difusom a estas convocatórias através de listagens de correio, telemóveis, cartazes, páginas web, etc. quando tanto “O Ché” quanto o Carlos Cela se encontram em paradeiro desconhecido, incomunicados e submetidos contra a sua vontade a umha situaçom de privaçom total de direitos que abre a porta à mais absoluta impunidade repressiva. Queremos exprimir também a nossa solidariedade com as famílias e as vizinhanças de ambos antifascistas após os assaltos e registos praticados na noite de onte por efectivos das forças de ocupaçom espanholas. Consideramos, finalmente, que estas detençons ponhem de relevo a absoluta vigência do delito de opiniom no Estado espanhol, tipificado legalmente polo PP e aplicado rigorosamente polo PSOE dentro dumha guerra de relevos contra toda dissidência política que, neste momento, alcança de forma especialmente contundente diversas estruturas do Movimento de Liberaçom Nacional Galego. Perante esta ofensiva, que valorizamos como estratégica, e nom meramente conjuntural ou eleitoral, convidamos a todos e todas as democratas deste País a mobilizar-se desouvindo o estado de terror psicológico que pretendem impor estes operativos policiais para 1º Defender plenas liberdades democráticas de opiniom, reuniom, manifestaçom e associaçom para todos os galegos e galegas. 2º Denunciar a persistência dum tribunal político de excepçom como a ‘Audiencia Nacional’, constituida para a repressom da dissidência política e do delito de natureza política e que ampara a violência, a tortura e os maus tratos policiais. 3º Exigir a derrogaçom da legislaçom ‘antiterrorista’, os regimes de incomunicaçom e a aplicaçom sistemática da tortura como tenhem denunciado entidades tam pouco suspeitas de dar cobertura a “movimentos radicais” como Amnesty International. 4º Demandar do PSOE a liberdade para os nossos compatriotas Carlos Cela e Xosé Luís Fernández e a sua imediata repatriaçom. As autoconvocatórias a celebrar nas próximas horas estám convocadas em: A Corunha: Praça do Obelisco às 20:30 h. Vigo: Museu Marco (Rua do Príncipe) às 20:00 h.