Os Três do Eixo ingressárom no macrocárcere de Teixeiro arroupados por umha multitude

Finalmente, os três vizinhos do Eixo condenados pola Justiça espanhola por agredir um agente policial em 1998 ingressárom em prisom. Por volta de 600 pessoas respondérom à convocatória de concentraçom realizada pola associaçom de vizinh@s da parróquia para acompanhar os agora presos ao macrocárcere de Teixeiro. Um número menor –por volta de 250 pessoas- deslocava-se até o centro penitenciário construido na comarca das Marinhas e despedia entre gritos de apoio os últimos danificados por um atropelo policial e judicial. A esperança do movimento vizinhal de solidariedade com os Três do Eixo cifra-se agora em que o ‘Consejo de Ministros’ de Espanha conceda o indulto solicitado. Lembramos que mais de 12.000 pessoas assinárom a demanda de liberdade para Jesus Montoiro, José Moreira e Simón Márquez. A mobilizaçom anti-repressiva tivo nesta ocasiom a inusual cobertura de cadeias televisivas espanholas que emitírom a notícia nos seus telejornais da noite. Entrevista em Madrid sem compromissos Apontar ao respeito que um comité de vizinh@s solidári@s com os encarcerados se entrevistava na passada quinta-feira com o titular espanhol de ‘Justicia’ para tratar sobre a concessom da liberdade. O presidente da Federaçom do Rural de Santiago, José Maria Juncal, anunciou que recebera umha “boa” impressom do encontro, mas apontou também que por parte do ministro espanhol “nom se falou de prazos” ao tempo que se exigírom mais elementos de juízo para somar à petiçom. Assi as cousas, a bola está neste momento no telhado do Executivo de Rodríguez Zapatero.