Quando se desconhece a posiçom que adoptará finalmente o ‘Consejo de Ministros’ de Espanha a respeito da petiçom de indulto solicitada para os Três do Eixo, continua a conta atrás para o ingresso em prisom de Simón Marquez, José Moreira e Jesus Montoiro. Por volta de 6000 pessoas manifestavam-se onte na capital galega para exigir que os três luitadores em defesa da segurança vial na paróquia do Eixo nom sejam encarcerados e que Madrid assine a petiçom de indulto solicitada por mais de 12.000 pessoas. A mobilizaçom convocada na manhá deste domingo descorreu desde a Alameda de Compostela até a Praça da Quintá. Centos de vizinhos partiram com antelaçom a pé desde a paróquia do Eixo e O Castinheirinho até a cidade em manifestaçom coreando palavras-de-ordem como ‘Cadeia nom, indulto já!’, ‘Os Três do Eixo somos todos’, ‘Nunca mais cargas policiais’, ‘Liberdade para os do Eixo’ ou ‘Som inocentes, fomos nós!’. Represada a mobilizaçom numha Quintá que tinha quase cuberta a sua parte inferior, como se pode aprezar na imagem, o actor Miguel de Lira e o escritor galeguista Suso de Toro dirigírom-se aos e às presentes. De Toro afirmou que “as contas da Justiça nom quadram” e indicou que, enquanto se pretende encarcerar três luitadores pola segurança vial, “reconhecidos delinquentes seguem nas ruas”. Interviu também ante @s manifestantes a mae de Simón Márquez que, trás reivindicar o indulto para os três condenados, gritou pola megafonia ‘Galiza em pé’ e solicitou a retirada das forças armadas (sic) ante a evidente perplexidade e incomodidade dalguns representantes do PSOE e o BNG que apoiavam com a sua presença a petiçom de indulto. Márquez, Moreira e Montoiro comparecérom no palco da Quintá para agradecer a solidariedade e reafirmar, mais umha vez, que o processo de que som objecto é fraudulento. Iminente ingresso em prisom Independentemente de que resolva finalmente o ‘Consejo de Ministros’ de Espanha, todo parece indicar que os Três do Eixo ingressarám no macrocárcere de Teixeiro no dia 31 deste mês tal e como tem previsto a Justiça espanhola. Desde a organizaçom da mobilizaçom solidária anunciou-se que, de produzir-se finalmente este cenário, os vizinhos e vizinhas acompanhariam em manifestaçom os condenados até o centro penitenciário espanhol. Como indicamos em notícias anteriores sobre este processo, o encarceramento dos três vizinhos enquadra-se num processo de exemplarizaçom repressiva que pretende transmitir nitidamente a intangibilidade das FSE e o seu direito a fazer uso da violência contra a cidadania em regime de monopólio. As palavras-de-ordem ‘Os três do Eixo somos todos’, gritadas reiteradamente, indicavam dalgum modo a identificaçom de toda a paróquia compostelana com os três retaliados que, além desta condena a prisom por 7 anos, fôrom sentenciados a pagar ao Estado espanhol mais de 156.000€. Censura organizada Segundo soubo Ceivar de fontes directamente vinculadas à intensa campanha de solidariedade com os Três do Eixo, carros à paisana deslocárom durante as noites passadas grupos de indivíduos em distintos pontos da capital galega ao objecto de proceder à retirada sistemática dos cartazes que anunciavam a mobilizaçom de domingo. Trás produzir-se estas retiradas, os veículos regressavam aos pontos em que deixaram os seus viageiros e recolhiam estes. Segundo estas mesmas fontes, os indivíduos que procediam à retirada som delinquentes menores habituais na capital galega. Contodo, a disposiçom de veículos, o desinteresse objectivo que estes indivíduos teriam em censurar umha convocatória destas características e o grau de organizaçom demonstrado na supressom da propaganda indicariam a existência dumha iniciativa organizada e planificada cuja autoria, a dia de hoje, parece impossível adjudicar, mas que, à vista do carácter do caso e as formas de actuaçom empregadas, parece apontar claramente para umha única origem. Recomendamos visitar a galeria fotográfica à que se acede através da ligaçom colocada ao pé desta informaçom.